ভাৰতত গ্ৰীষ্ম প্ৰৱাহে গুৰুতৰ ৰূপ ধাৰণ কৰিছে৷ দেশখনৰ বৃহৎ অংশত উষ্ণতা প্ৰায় ৪৫ ডিগ্ৰী চেলছিয়াছলৈ বৃদ্ধি পাইছে আৰু এই বছৰৰ গ্ৰীষ্মকাল আটাইতকৈ বেছি গৰমৰ হ’ব যেন দেখা গৈছে৷ ভাৰতীয় বতৰ বিজ্ঞান বিভাগ চমুকৈ আই এম ডি-এ কমেও পাঁচখন ৰাজ্যত গ্ৰীষ্ম প্ৰৱাহ কিছুদিনলৈ অব্যাহত থাকিব বুলি ঘোষণা কৰিছে৷
আই এম ডিয়ে ভৱিষ্যদ্বাণী কৰিছে যে দেশখনৰ বৃহৎ অংশত অহা কমেও পাঁচ দিনলৈ গ্ৰীষ্ম প্ৰৱাহ অব্যাহত থাকিব৷ অহা তিনি দিনত উত্তৰ ভাৰতৰ অধিকাংশ ঠাইত উষ্ণতা প্ৰায় ২ ডিগ্ৰী চেলছিয়াছ বাঢ়িব পাৰে আৰু তাৰ পাছত প্ৰায় ২ ডিগ্ৰী চেলছিয়াছ কমিব৷
ৰাজস্থান, দিল্লী, হাৰিয়ানা, উত্তৰ প্ৰদেশ আৰু ওড়িষাত উষ্ণতা ৪৫ ডিগ্ৰী চেলছিয়াতকৈও বেছি হৈছে৷ মে’ৰ প্ৰথম সপ্তাহলৈকে প্ৰচণ্ড গৰম অব্যাহত থাকিব আৰু তাৰ পাছত বৰষুণৰ সম্ভাৱনা আছে৷ আজি দিল্লীত সৰ্বোচ্চ তাপমাত্ৰা ৪৩.৫ ডিগ্ৰী চেলছিয়াছ আছিল৷
এপ্ৰিল মাহত ৰাজধানীত ইমান বেছি গৰম ১২ বছৰত প্ৰথম৷ ইয়াৰ আগতে ২০১০ চনৰ ১৮ এপ্ৰিলত সৰ্বোচ্চ উষ্ণতা ৪৩.৫ ডিগ্ৰী চেলছিয়াছ হৈছিল৷ উষ্ণতা বৃদ্ধি পোৱাৰ লগে লগে সমগ্ৰ ভাৰতত ঔদ্যোগিক কাম-কাজত প্ৰভাৱ পৰিছে৷
দেশখনৰ বৃহৎ অংশত শক্তিৰ চাহিদা দ্ৰুত বৃদ্ধি পাইছে৷ মহাৰাষ্ট্ৰৰ তাপবিদ্যুৎ প্ৰকল্পবোৰৰ বাবে ২০ হাজাৰ লাখ কয়লাৰ নাটনি হৈছে৷ ৰাজস্থানৰ কাৰখানাবোৰত আৰু গ্ৰাম্য অঞ্চলবোৰত চাৰি ঘণ্টাকৈ বিদ্যুৎ কৰ্তন কৰা হৈছে৷
অথচ চূড়ান্ত গৰমৰ দিন আহিবলৈ এতিয়াও বাকী৷ জুনত বাৰিষা আৰম্ভ হোৱাৰ পাছত উষ্ণতা কিছু হ্ৰাস পাব৷ জম্মু আৰু কাশ্মীৰ, ওড়িষা, পশ্চিম বংগত উষ্ণতা ৪০ ডিগ্ৰী চেলছিয়াছতকৈও বেছি হৈছে৷ প্ৰচণ্ড গৰমৰ মাজতে কয়লাৰ তীব্ৰ নাটনিৰ কাৰণে দেশখনৰ বহু অংশত বিদ্যুৎ কৰ্তন কৰা হৈছে৷
