গাখীৰক এক সম্পূৰ্ণ আহাৰ হিচাপে বিবেচনা কৰা হয়৷ আমি প্ৰত্যেকেই গাখীৰৰ লগত আমাৰ মন পচন্দৰ ফল, বিস্কুট, কে’ক আদি খাই ভাল পাওঁ৷ কিন্তু আয়ুৰ্বেদৰ মতে গাখীৰে আপোনাৰ শৰীৰৰ অনিষ্ট কৰিব পাৰে, যদিহে আপুনি ভুল কম্বিনেশ্যন কৰি খায়৷
বহুতো মানুহে গাখীৰ আৰু কল একেলগে খাই ভাল পায়৷ কিন্তু আয়ুৰ্বেদে এই কম্বিনেশ্যন খোৱাৰ উপযোগী নহয় বুলি কৈছে৷ আয়ুৰ্বেদৰ মতে আমাৰ দেহৰ ভিতৰৰ ‘অগ্নি’ বা ডাইজেষ্টিভ ফায়াৰে খাদ্য হজম প্ৰক্ৰিয়া নিয়ন্ত্ৰণ কৰে৷ সেয়েহে আমি যদি এনেকুৱা কিছুমান খাদ্যৰ কম্বিনেশ্যন খাওঁ, যিয়ে আমাৰ দেহৰ ভিতৰত অগ্নিৰ পৰিমাণ বঢ়াই দিয়ে, তেতিয়া আমাৰ হজম প্ৰক্ৰিয়া দুৰ্বল হৈ যায় আৰু ইয়ে শৰীৰত টক্সিন উৎপন্ন কৰি ৰোগৰ সৃষ্টি কৰে৷ সেয়েহে গাখীৰক বিস্কুট, কে’ক, দৈ, খিচিৰি, কল, আচাৰ, মাছ, মাংস, কণী আদিৰ লগত খাব নালাগে৷
গাখীৰ হজম হ’বলৈ সময় লাগে আৰু আপুনি যদি গাখীৰৰ লগত নেমু, আচাৰ বা যিকোনো টেঙা ফল খায়, তেন্তে গাখীৰখিনি ডাঠ হৈ যায়৷ ফলত আপোনাৰ গেছ, বুকু জ্বলা-পোৰা আদি হ’ব পাৰে৷ একেদৰে মাছ-মাংস খাই উঠিও গাখীৰ খোৱাটো উচিত নহয়৷ কল আৰু গাখীৰো হজম হ’বলৈ বহু সময় লাগে৷ যেতিয়ালৈকে দুয়োবিধ খাদ্য হজম নহয়, তেতিয়ালৈকে ভাগৰ, দুৰ্বল, গা বেয়া লগা আদি হোৱা দেখা যায়৷
