পৌৰ নিগম কৰ্তৃপক্ষই বেচৰকাৰী সংস্থাৰ দ্বাৰা ঘৰে ঘৰে সংগ্ৰহ কৰা আৰু বাণিজ্যিক প্ৰতিষ্ঠানৰ পৰা সংগ্ৰহ কৰা জাবৰৰ বাবত নিৰ্ধাৰণ কৰা মাচুল বৃদ্ধি কৰাৰ সিদ্ধান্ত গ্ৰহণ কৰিছে৷ অৱশ্যে বৰ্তমানলৈ এই সিদ্ধান্ত গুৱাহাটী পৌৰ নিগম কৰ্তৃপক্ষই কাৰ্যকৰী কৰা নাই যদিও অতি সোনকালে কাৰ্যকৰী কৰা হ’ব বুলি জানিব পৰা গৈছে৷
যোৱা দুবছৰত ইন্ধনৰ দাম বৃদ্ধি হোৱাৰ পৰিপ্ৰেক্ষিতত আৰু জাবৰ সংগ্ৰহ কৰা বেচৰকাৰী সংস্থাবোৰৰ হেঁচাতেই পৌৰ নিগম কৰ্তৃপক্ষই এই মাচুল বৃদ্ধিৰ সিদ্ধান্ত গ্ৰহণ কৰিছে৷ এই সন্দৰ্ভত গুৱাহাটী পৌৰ নিগমৰ মেয়ৰ মৃগেন শৰণীয়াই কয় যে ২০১৪ চনতে গুৱাহাটী পৌৰ নিগম কৰ্তৃপক্ষই বেচৰকাৰী সংস্থাৰ দ্বাৰা ঘৰে ঘৰে সংগ্ৰহ কৰা আৰু বাণিজ্যিক প্ৰতিষ্ঠানৰ পৰা জাবৰ সংগ্ৰহ কৰাৰ মাচুল বৃদ্ধি নিৰ্ধাৰণ কৰিছিল৷
সেই মাচুল যোৱা ৭-৮ বছৰে বৃদ্ধি কৰা হোৱা নাই৷ এতিয়া জাবৰ নিষ্কাশনৰ কাম পূৰ্বতকৈ ভালকৈ কৰাৰ বাবে জাবৰ সংগ্ৰহৰ মাচুল সামান্যহে বৃদ্ধি কৰাৰ সিদ্ধান্ত লোৱা হৈছে৷ আনহাতে এইবাৰৰ পৰা মহানগৰৰ আত্মসহায়ক গোটসমূহক জাবৰ সংগ্ৰহৰ দায়িত্ব দিয়া হ’ব বুলি উল্লেখ কৰি এই সন্দৰ্ভত গুৱাহাটী পৌৰ নিগম কৰ্তৃপক্ষই ইতিমধ্যে নিবিদা আহ্বান কৰাৰ কাম সম্পন্ন কৰিছে বুলিও গুৱাহাটী পৌৰ নিগমৰ মেয়ৰ মৃগেন শৰণীয়াই জানিবলৈ দিছে৷
উল্লেখ্য যে মহানগৰৰ প্ৰতিঘৰ মানুহৰ পৰা সংগ্ৰহ কৰা জাবৰৰ বাবত গুৱাহাটী পৌৰ নিগম কৰ্তৃপক্ষই বেচৰকাৰী সংস্থাৰ দ্বাৰা ৩০ টকা মাচুল আদায় কৰিছিল৷ এতিয়া এই মাচুলৰ পৰিমাণ ৫০ টকাপৰ্যন্ত বৃদ্ধি কৰাৰ সিদ্ধান্ত লোৱা হৈছে৷ তেনেদৰে বাণিজ্যিক প্ৰতিষ্ঠানৰ পৰা সংগ্ৰহ কৰা জাবৰৰ বাবত মাচুল ২০ টকাৰ পৰা ১০০ টকা পৰ্যন্ত বৃদ্ধি কৰাৰ সিদ্ধান্ত লোৱা হৈছে৷
