খং হৈছে মানুহৰ এনে এক মানসিক প্ৰতিক্ৰিয়া, যিয়ে এখন ঘৰ, এটা বহুদিনীয়া ভাল সম্পৰ্ক নিঃশেষ কৰি দিব পাৰে৷ এই প্ৰতিক্ৰিয়াৰ ফলত সময়ে সময়ে বহুতো অপ্ৰীতিকৰ ঘটনা ঘটা দেখিবলৈ পোৱা যায়৷ কিছুমান এনেকুৱা লোকো আছে, যাৰ সৰু সৰু কথাতে খং উঠে৷ বিচৰা বস্তু সময়মতে নাপালে, কাৰোবাৰ কথাত মন নিমিলিলে, অহংকাৰ, শাৰীৰিক অসুস্থতা আদি বিভিন্ন কাৰণত খং উঠে৷ কিন্তু এটা সম্পৰ্ক ভালে ৰাখিবলৈ হ’লে খং নিয়ন্ত্ৰণ কৰাটো অতিকে জৰুৰী৷ আপুনিও নিজৰ খঙৰ ওপৰত নিয়ন্ত্ৰণ হেৰুৱাইছে নেকি, তেন্তে লওক এইকেইটা টিপছ৷
(১) খং উঠিলে আপুনি বাহিৰত মুকলি ঠাইলৈ ওলাই যাব পাৰে৷ মুকলি বতাহে আপোনাৰ মগজু শান্ত কৰি খং কমাব পাৰে৷
(২) যিমানে খং নুঠক কিয় পৰাপক্ষত মনে মনে থকাটো ভাল৷ কিয়নো এবাৰ এৰা বাণ পুনৰ ঘূৰি নহাৰ দৰে আপোনাৰ খঙত ওলোৱা এষাৰ বাক্যই সন্মুখৰ মানুহজনৰ মনত আঘাত দিব পাৰে৷
(৩) গোটেই দিনটো স্ত্ৰেচফুল হ’লে বা কামৰ অধিক বোজাৰ বাবে খং নিয়ন্ত্ৰণ শক্তি হেৰাই যায়৷ সেয়েহে যিমানে কামৰ বোজা নহওক কিয় মাজে মাজে সৰু বিৰতি ল’লে ই আপোনাৰ স্ত্ৰেচ কমাব পাৰে৷
(৪) ডীপ ব্ৰিডিং এক্সাৰছাইজ, অৰ্থাৎ উশাহ-নিশাহৰ ব্যায়াম কৰিলেও ই মগজুৰ কাৰ্যক্ষমতা বৃদ্ধি কৰি খং নিয়ন্ত্ৰণত ৰাখিব পাৰে৷
(৫) অধিক খং উঠিলে সেই কথাটোৰ পৰা এৰাই চলাই মনপচন্দৰ গান শুনিবলৈ চেষ্টা কৰক৷
(৬) যদি খং নিয়ন্ত্ৰণ কৰিব পৰা নাই, তেন্তে হেডবাথ ল’লেও ই কিছু পৰিমাণে আপোনাক সকাহ দিব পাৰে৷
