দুধদানিৰ বটলৰ ব্যৱহাৰে শিশুৰ দাঁতৰ গঠন বেয়া কৰিব পাৰে৷
যিহেতু দাঁত দুপাৰিয়েই আপোনাৰ সৌন্দৰ্য বৃদ্ধিৰ অন্যতম কাৰক৷ গতিকে সৰুৰ পৰাই আপুনি নিজৰ লগতে আপোনাৰ শিশুৰ দাঁতৰ যতন লোৱা উচিত৷ কাৰণ অকণমান ইফাল-সিফাল হ’লেই দাঁতত পোকে ধৰিব পাৰে লগতে দাঁতৰ গঠনো বেয়া হ’ব পাৰে৷ আপুনি নিশ্চয় উচলা, তেৰা বেঁকা দাঁতৰ গঠনৰ লোক দেখা পাইছে আৰু তেওঁলোকক দেখি হয়তো আপোনাৰ মনত এটা কথাই আহিছে যে তেওঁলোকৰ দাঁত জন্মগতভাৱেই তেনেকুৱা৷ কিন্তু দৰাচলতে আপোনাৰ সৰুতে কৰা কিছু বদঅভ্যাসৰ বাবেও দাঁতৰ গঠন বেয়া হ’ব পাৰে৷(১) জন্মৰ পাছত কেইমাহমানলৈ শিশুৰ আঙুলি খোৱা স্বভাৱ গঢ় লৈ উঠে৷ কিছু সময়ৰ কাৰণে এই অভ্যাসে বিশেষ কোনো সমস্যাৰ সৃষ্টি নকৰে যদিও গাখীৰ খোৱা দাঁত সৰাৰ পাছত এই অভ্যাস লাহে লাহে এৰি দিয়া উচিত৷ আঙুলি চোহা নাইবা পেচিফায়াৰৰ ব্যৱহাৰৰ ফলত দাঁতত লগা বীজাণু মুখেৰে সোমাব পাৰে আৰু দীৰ্ঘসময়লৈ আঙুলি চুহিলে দাঁতৰ গঠন বেয়া হ’ব পাৰে৷
(২) দুধদানিৰ বটলৰ ব্যৱহাৰে শিশুৰ দাঁতৰ গঠন বেয়া কৰিব পাৰে৷ এই বটলে দাঁতৰ ওপৰৰ অংশত বেছিকৈ প্ৰভাৱিত কৰে৷ যাৰ ফলত ওপৰ পাৰি দাঁত বাহিৰ ফালে ওলাই অহাৰ দৰে গঠন ল’ব পাৰে৷ গতিকে বেছি সময়লৈ গাখীৰৰ বটল শিশুৰ মুখত লোৱাৰ অভ্যাস নকৰিব৷
(৩) শিশুৰ দাঁত গজাৰ সময়ত যেতিয়া অলপ বিষ অনুভৱ হয়, তেতিয়া কিছুসংখ্যক শিশুৱে বিষ অনুভৱ কমাবলৈ টিথাৰ ব্যৱহাৰ কৰে নাইবা নখ কামোৰাৰ অভ্যাস গঢ় লৈ উঠে৷ ইয়াৰ ফলতে দাঁতৰ গঠন তেৰা বেঁকা হ’ব পাৰে৷
গতিকে শিশু অৱস্থাতে দাঁত যাতে তেৰা বেঁকা নহয়, এনেবোৰ অভ্যাসৰ পৰা শিশুটিক আঁতৰত ৰাখক৷
লগতে চাওক- আপুনি জানেনে? Top 5 simple health hacks you can use everyday.
