ৰাজ্যত হৈ থকা ধাৰাসাৰ বৰষুুণৰ ফলত পুনৰ দিনক দিনে বান পৰিস্থিতিৰ অৱনতি ঘটিছে৷ এইপৰ্যন্ত ৰাজ্যৰ ২৫খন জিলাত বানে ভয়াৱহ ৰূপ ধাৰণ কৰিছে৷ বছৰটোৰ দ্বিতীয়টো বানত এইপৰ্যন্ত ৪জনৰ সলিল সমাধি ঘটিছে৷
উল্লেখ্য যে ৰাজ্যৰ প্ৰতিখন নৈ-উপনৈৰ জলস্তৰ সম্প্ৰতি বিপদসীমা অতিক্ৰম কৰিছে৷ বজালী, বঙাইগাঁও, বৰপেটা, বিশ্বনাথ, বাক্সা, চিৰাং, দৰং, ধেমাজি, ধুবুৰী, ডিব্ৰুগড়, ডিমা-হাছাও, গোৱালপাৰা, হোজাই, কামৰূপ, পশ্চিম কাৰ্বি আংলং, কোকৰাঝাৰ, লখিমপুৰ, মাজুলী, নগাঁও নলবাৰী, শোণিতপুৰ, তামুলপুৰ, ওদালগুৰি আদি জিলাত বানে ক্ৰমাৎ জটিল ৰূপ ধাৰণ কৰিছে৷
আনহাতে বতৰ বিজ্ঞান কেন্দ্ৰই অসমৰ কোকৰাঝাৰ, বঙাইগাঁও, দৰং, ওদালগুৰি, বাক্সা, বৰপেটা, কামৰূপ, গোৱালপাৰা, দক্ষিণ শালমাৰা, মৰিগাঁও আৰু শোণিতপুৰ জিলাৰ জিলা প্ৰশাসনক সতৰ্ক কৰি দিছে৷ ইফালে ৰাজ্যৰ প্ৰান্তে প্ৰান্তে ভূমিস্খলনে ভয়াৱহ ৰূপ ধাৰণ কৰিছে৷ বান-ভূমিস্খলনৰ ফলত স্বাভাৱিক জীৱনযাত্ৰা ব্যাহত হৈ পৰিছে৷
আনহাতে হঠাতে ভয়াৱহ ৰূপ ধাৰণ কৰা বানে ৰাজ্যৰ বিভিন্ন স্থানত ৰে’লপথ বুৰাই পেলোৱাত আজি কেইবাখনো ৰে’লৰ চলাচল আদবাটতে স্তব্ধ হৈ পৰে৷ বৰ্তমান বানাক্ৰান্ত লোকৰ অৱস্থা নাজল-নাথল হৈ পৰিছে৷ ৰাজ্যৰ এনে দুৰ্যোগময় পৰিস্থিতিৰ বহু লোকৰ ঘৰ-বাৰী, ঘৰৰ সা-সম্পত্তি, পোহনীয়া জীৱ-জন্তু, ভঁৰালৰ ধানমুঠি সকলো বানে উটুৱাই নিছে৷
ইয়াৰ ফলত উৱাদিহ নোপোৱা হৈছে৷ ইফালে বানপানীৰ মাজত ৰুগীয়া বৃদ্ধ লোক, সদ্যোজাত কেঁচুৱাক লৈ কটাবলগীয়া হৈছে৷ বহু বানাক্ৰান্তই এমুঠি অন্ন, বিশুদ্ধ খোৱাপানী, ঔষধ আদি খাবলৈ নাপায় অসহায় জীৱন-যাপন কৰিবলগীয়া হৈছে৷
ঘৰ-দুৱাৰ সকলো বানে উটুৱাই নিয়াত থাকিবলৈ ঘৰ নোহোৱাত ৰাস্তাই-ঘাটে নিশা উজাগৰে যাপন কৰিছে৷ সৰ্বোচ্চ হেৰুৱাই এতিয়া বানে ধুৱাই নিয়া লোকসকলে কি কৰিব, ক’ত যাব এক অসহায় পৰিস্থিতিৰ সন্মুখীন হৈছে৷ এনে দুৰ্যোগপূৰ্ণ সময়ত আমি সকলোৱে তেওঁলোকৰ ওচৰত থিয় দিয়াটো নৈতিক দায়িত্ব৷
আমি নিজৰ সাধ্যানুসৰি সেইসকল লোকৰ সহায় কৰাটো নিতান্তই প্ৰয়োজনীয়৷ কিয়নো দুখৰ সময়ত মানুহৰ ওচৰত থিয় দিয়া এক উচিত কাম বুলি সকলোৱে জানো৷ আহক আমি হাতে হাত ধৰি এই অসহায়, দুৰ্যোগগ্ৰস্ত লোকসকলৰ ওচৰত থিয় দি সহায়ৰ হাত আগবঢ়াওঁ৷
