ঠাণ্ডাৰ দিনত প্ৰত্যেকৰে গাৰ ছাল শুকান আৰু খহটা হোৱাটো স্বাভাৱিক৷ ঠাণ্ডা জলবায়ু তথা ঠাণ্ডা বতাহৰ ফলত গাৰ ছালসমূহ ফাটিবলৈ আৰম্ভ কৰে৷ ইয়াৰ প্ৰথম প্ৰভাৱ পৰে আমাৰ নাকত৷ ঠাণ্ডাৰ দিনত নাকৰ সন্মুখভাগ শুকাই থকা বা নাকৰ ভিতৰ অংশ ঘনাই শুকাই যোৱাৰ অভিজ্ঞতা আপোনাৰ নিশ্চয় আছে৷ দেহত পানীৰ অভাৱ হ’লেও শুকান নাকৰ সমস্যাই দেখা দিয়ে৷ পিছে এনেকুৱা অৱস্থাত আপুনি কি কৰিব৷
(১) নাক শুকাই যোৱাৰ সমস্যা হ’লে আঙুলিত অলপ পেট্ৰলিয়াম জেলি লৈ নাকৰ বাহিৰৰ যি অংশত ফাটিছে আৰু নাকৰ ভিতৰৰ শুকান অংশত লগাই দিলে এই সমস্যা নিৰাময় হয়৷
(২) নাৰিকল তেলো এই ক্ষেত্ৰত বিশেষভাৱে কাৰ্যকৰী৷ ইয়াৰ বাবে দিনে কমেও তিনি-চাৰিবাৰমান নাকৰ ছালত নাৰিকলৰ তেল লগাওক৷ নাকৰ ভিতৰৰ শুকাই যোৱা অংশতো দুটোপালকৈ নাৰিকলৰ তেল দিলে সুফল লাভ কৰিব পাৰি৷
(৩) বেবী ৱাইপছেৰে নাকৰ ভিতৰ অংশ অতি সাৱধানতাৰে পৰিষ্কাৰ কৰা উচিত৷ ই ছালখন চাফা আৰু মসৃণ হৈ থকাত সহায় কৰে৷
(৪) যিহেতু ঠাণ্ডাৰ দিনত আমাৰ পানী খোৱাৰ পৰিমাণ কমি যায়, সেয়েহে দেহত পানীৰ অভাৱ হৈ ছালখন শুকান হ’বলৈ আৰম্ভ কৰে৷ সেয়েহে যিমান পাৰি গৰম পানী, নেমুৰ ৰস, ডাব নাৰিকলৰ পানী, ফলৰ ৰস, চুপ আদি খাই শৰীৰটো হাইড্ৰেট কৰি ৰখা উচিত৷
(৫) গৰম পানীৰ ভাপ নাকেৰে ল’লেও শুকান ছাল তথা নাকৰ ভিতৰৰ অংশ শুকাই থকাৰ সমস্যাৰ পৰা ৰক্ষা পাব পাৰি৷
