ভাতৰ মাৰ নিশ্চয় আপুনি পেলাই দিয়ে-- নহয়নে ? কিন্তু ইয়াৰ উপকাৰিতাৰ কথা জানিলে আপুনি আচৰিত হ'ব৷ ইয়াত লুকাই আছে বহুতো সমস্যাৰ সমাধান৷ ভাতৰ মাৰৰ পৰা কি কি লাভ হয় জানো আহক৷(১) বহু ক্ষেত্ৰত ছালৰ সংক্ৰমণ হৈ একজিমা নামৰ এবিধ ৰোগ হোৱা দেখা যায়৷ এই ৰোগৰ পৰা সকাহ পাবলৈ ভাতৰ মাৰ ঠাণ্ডা কৰি নিয়মিতৰূপে ছালত লগালে উপকাৰ পোৱা যায়৷
(২) ছালৰ টান খোৱা ভাব নাইকিয়া কৰিবলৈ সদায় ছালখনত ভাতৰ মাৰ সানিব লাগে৷ ভাতৰ মাৰে ছালখনত ট’নাৰ হিচাপে কাম কৰে৷
(৩) ভাতৰ মাৰে প্ৰাকৃতিক কণ্ডিশ্যনাৰ হিচাপে কাম কৰে৷ ইয়াৰ বাবে চুলি ছেম্পু কৰাৰ আগে আগে ভাতৰ মাৰ ঘঁহি পাছত ভালদৰে চুলিখিনি ধুই দিয়ক৷
(৪) ডায়েৰিয়াত আক্ৰান্ত লোকে ভাতৰ মাৰত অলপ নিমখ মিহলাই সেৱন কৰিলে লগে লগে সুফল পাব পাৰে৷ ইয়াৰ উপৰি ভাতৰ মাৰে শৰীৰক শক্তি যোগায়, পেট ঠাণ্ডা কৰি ৰাখে৷
(৫) ইয়াৰ বাহিৰেও ভাতৰ মাৰে প্ৰাকৃতিক সাৰ হিচাপে কাম কৰে৷ গছৰ গুৰিত ভাতৰ মাৰ দিলে গছডালে পৰ্যাপ্ত সাৰ পায়৷
(৬) ভাতৰ মাৰ কাপোৰ ধোওঁতে মাৰ হিচাপেও ব্যৱহাৰ কৰিব পাৰি। কাপোৰত ভাতৰ মাৰ দিলে কাপোৰ নতুনৰ দৰে হৈ উঠে৷
এটা কথা মন কৰিব– ভাতৰ মাৰ প্ৰস্তুত হোৱা চাউলখিনি ভালদৰে কেইবাবাৰো ধুইহে তাৰ পৰা ওলোৱা মাৰখিনি ব্যৱহাৰ কৰিব৷ ইয়াৰ উপৰি বজাৰত পোৱা সহজলভ্য, ৰাসায়নিক পাউডাৰ মিহলোৱা চাউলৰ পৰা ওলোৱা মাৰ কেতিয়াও ব্যৱহাৰ নকৰিব৷ ঘৰুৱাভাৱে প্ৰস্তুত কৰা চাউলৰ মাৰহে ব্যৱহাৰ কৰা উচিত৷
