Home Daily news দিল্লীত প্ৰদূষণৰ মাত্ৰা শোচনীয় পৰ্যায়লৈ আগবাঢ়িছে

দিল্লীত প্ৰদূষণৰ মাত্ৰা শোচনীয় পৰ্যায়লৈ আগবাঢ়িছে

দিল্লীত প্ৰদূষণৰ বিপজ্জনক পৰ্যায়লৈ লক্ষ্য কৰি দিল্লী চৰকাৰৰ পৰিৱেশ মন্ত্ৰী গোপাল ৰায়ে  দিল্লী চৰকাৰৰ ৫০ শতাংশ কৰ্মচাৰীক ঘৰৰ পৰা কাম কৰাকে ধৰি এলানি নিৰ্দেশ প্ৰকাশ কৰিছে৷ দিনটোৰ আগভাগত মুখ্যমন্ত্ৰী অৰবিন্দ কেজৰিৱালে কৈছিল যে শিশুক শোচনীয় বায়ু মানৰ পৰা ৰক্ষা কৰিবৰ বাবে প্ৰাথমিক বিদ্যালয়সমূহ [প্ৰথমৰ পৰা পঞ্চম শ্ৰেণীলৈ] বন্ধ দিয়া হৈছে৷ নিৰ্দেশাৱলীৰ মতে পৰিস্থিতি উন্নত নোহোৱালৈকে দিল্লী-এন চি আৰৰ প্ৰাথমিক বিদ্যালয়বোৰ বন্ধ থাকিব৷ নিৰ্দেশাৱলীত ব্যক্তিগত খণ্ডৰ কাৰ্যালয়ৰ বাবেও নিৰ্দেশ জাৰি কৰা হৈছে৷ আনহাতে অত্যাৱশ্যকীয় সেৱাৰ বাহিৰে সকলো ধৰণৰ ট্ৰাকৰ যাতায়াত বন্ধ কৰা হৈছে৷ অৱশ্যে চি এন জি আৰু বিদ্যুৎচালিত ট্ৰাকক এই নিষেধাজ্ঞাৰ পৰা ৰেহাই দিয়া হৈছে৷ বি এছ-৬১ তলৰ গাড়ীকে ধৰি সকলো ডিজেলচালিত গাড়ীৰ যাতায়াত বন্ধ কৰা হৈছে৷ ইফালে ৰাজহুৱা পৰিবহণ ব্যৱস্থা উন্নত কৰিবলৈ পৰিবহণ বিভাগে ব্যক্তিগত খণ্ডৰ ৫০০খন চি এন জি চালিত বাছ নিয়োগ কৰিব৷ 
ইফালে মহকুমা দণ্ডাধীশে আৱাসিক কল্যাণ সংস্থাসমূহৰ সৈতে আলোচনা কৰিব তথা ৰাতি থকা সুৰক্ষা কৰ্মীৰ বাবে বৈদ্যুতিক হীটাৰৰ ব্যৱস্থা কৰিবলৈ নিৰ্দেশ দিব৷ পৰিৱেশ মন্ত্ৰীয়ে সংবাদ মাধ্যমক কয় যে প্ৰদূষণৰ সমস্যাৰ মোকাবিলা কৰিবৰ বাবে আজি ছজনীয়া এখন নিৰীক্ষণ সমিতি গঠন কৰা হৈছে৷  পৰিৱেশ মন্ত্ৰী ৰায়ে কয় যে দিল্লীত ঘাইপথ, অভাৰব্ৰীজ আৰু পাইপলাইনৰ কাম নিষিদ্ধ কৰা হ’ব৷ ইফালে দিল্লী-এন চি আৰত প্ৰদূষণ বৃদ্ধি পোৱাৰ সন্দৰ্ভত ৰাষ্ট্ৰীয় মানৱ অধিকাৰ আয়োগে পঞ্জাব, হাৰিয়ানা, উত্তৰ প্ৰদেশ আৰু দিল্লীৰ মুখ্য সচিবসকললৈ চমন জাৰি কৰিছে৷ আয়োগে কয় যে পৰিস্থিতিৰ মোকাবিলা কৰিবলৈ এতিয়ালৈকে লোৱা ব্যৱস্থাত তেওঁলোক সন্তুষ্ট নহয়৷ আয়োগে আৰু কয় যে দিল্লীৰ প্ৰদূষণ হ্ৰাস কৰিবলৈ অধিক ব্যৱস্থা গ্ৰহণৰ প্ৰয়োজন৷ উল্লেখ্য যে কেন্দ্ৰীয় প্ৰদূষণ পৰিষদৰ তথ্য মতে দিল্লীৰ বায়ু মান সূচকাংক [এ কিউ আই] আছিল ৪২৬৷ এ কিউ আই ৪০০-ৰ ওপৰত থাকিলে শোচনীয় বুলি ধৰা হয়৷

Most Popular

মছলা হিচাপে খোৱা কলাজিৰাৰআছে বিস্ময়কৰ শক্তি

প্ৰাচীন কালৰে পৰা কালজিৰা মানৱদেহৰ নানা ৰোগৰ চিকিৎসাত ব্যৱহাৰ হৈ আহিছে৷ কালজিৰা অকল খাদ্যৰ সোৱাদ বৃদ্ধিতে নহয়, ইয়াৰ বীজৰ পৰা উৎপন্ন হোৱা...

ৰেস্তোৰাঁত ফলৰ ৰসৰ পৰিৱৰ্তে ডিটাৰজেণ্ট মিহলি পানী : ক’ত?

ছ’চিয়েল মিডিয়াত প্ৰকাশিত এক আজব আৰু দায়িত্বজ্ঞানহীন কৰ্মই সৰ্বসাধাৰণৰ মাজত চাঞ্চল্যকৰ সৃষ্টি কৰিছে৷ চীনৰ ৰেস্তোৰাঁত ফলৰ ৰসৰ পৰিৱৰ্তে...

মহাবিশ্বত ISRO-ৰ ৰিইউজেবললঞ্চ ভেহিকলৰ পৰীক্ষাৰ পদক্ষেপ

এটা সময়ত সমুদ্ৰ বিশ্বৰ বাণিজ্য তথা শক্তিৰ কেন্দ্ৰ আছিল৷ কিন্তু লাহে লাহে এতিয়া মহাকাশে সেই স্থান পূৰ কৰিবলৈ...

পাঁচখন গাঁৱত ধূমপান নিষিদ্ধ!জানক ইয়াৰ আঁৰৰ কথা

ধূমপানৰ পৰা হ’ব পৰা ক্ষয়-ক্ষতিৰ তালিকাখন আমাৰ সকলোৰে জ্ঞাত৷ সেয়ে সময়সাপেক্ষে কিছুমান এলেকা বা অঞ্চল ধূমপানৰ পৰা সুৰক্ষিত হ’বলৈ নিষিদ্ধ কৰা হয়৷...