বৰ্তমান সময়ত প্ৰায়সংখ্যক ভাৰতীয় মহিলাই লিপেডেমাৰ চিকাৰ হৈছে৷ কিন্তু মহিলাসকলৰ কি এই সমস্যা আৰু এই সমস্যা হোৱাৰ কাৰণ কি এই বিষয়ে অলপ জানো আহক৷ নেশ্যনেল চেণ্টাৰ ফৰ বায়’টেকনেলজি ইনফৰমেশ্যনৰ তথ্য মতে দেশৰ বিভিন্ন ৰাজ্যত সমীক্ষা চলাই দেখা গৈছিল যে এঘাৰ শতাংশতকৈও বেছি মহিলাই এনে শাৰীৰিক সমস্যাত চিকাৰ হৈছে৷ লিপেডেমা কিন্তু ঠিক স্থূলতা নহয়, তেন্তে এই সমস্যা কি? লিপেডেমাৰ সমস্যা হ’লে শৰীৰৰ নিম্নাংশত মেদ জমা হয়৷ ভৰি, উৰু, তলপেট, কঁকাল, নিতম্ব আদি অংশবোৰত মেদ বা চৰ্বি জমা হয়৷ কিন্তু বেছিভাগ ক্ষেত্ৰতে সামঞ্জস্য নাথাকে৷ এইধৰণৰ সমস্যা ভাৰতীয় মহিলাসকলৰ মাজত বেছিকৈ দেখা গৈছে৷ চিকিৎসা বিজ্ঞানৰ পৰিভাষাত ইয়াক কোৱা হয় লিপেডেমা৷ এই ক্ষেত্ৰত শৰীৰৰ নিম্নাংশৰ ছালৰ তলত চৰ্বিৰ স্তৰ জমা হ’বলৈ আৰম্ভ কৰে৷ কোনো কোনো ক্ষেত্ৰত কঁকাল, নিতম্ব বা তলপটত বেছি চৰ্বি জমা হয়৷ উৰুত তেনেদৰে চৰ্বি জমা নহয়৷ কাৰো ক্ষেত্ৰত নিতম্ব আৰু উৰুত যিমান বেছিকৈ চৰ্বি জমা হয়. তাতকৈ পেট বা দুই বাহুত চৰ্বি জমা নহয়৷ অৰ্থাৎ শৰীৰৰ অংগবোৰত চৰ্বি জমাৰ ক্ষেত্ৰত সামঞ্জস্য থাকে৷ এই জমা হোৱা চৰ্বি কমাবলৈ বেছ কষ্টকৰ হয়৷ ইয়াৰ লগতে এই মেদে শৰীৰৰ গঠন নষ্ট কৰি পেলায়৷ লিপেডেমাত কেৱল যে চৰ্বিয়ে জমা হয় তেনে নহয়, শৰীৰৰ যি অংশত মেদ জমা হয়, সেই অংশৰ পেশীৰ বিষম যন্ত্ৰণা হয় লগতে মেদ জমা হোৱা ছালখিনি কোঁচ খাই যায় আৰু ওলমি পৰে৷ ছালৰ মেলানিন নষ্ট হয়, পিগমেণ্টশ্যন বা দাগ চোপ দেখা দিব পাৰে৷ ছালখন খুব স্পৰ্শকাতৰ হৈ পৰে৷ লিপেডেমা বংশগতভাৱে হ’ব পাৰে৷ এই ৰোগ বা সমস্যা বহুক্ষেত্ৰতে জিনবাহিত৷ হৰমনৰ তাৰতম্যৰ বাবে লিপেডেমাৰ সমস্যাই দেখা দিব পাৰে৷ যিসকল মহিলাৰ পলিচিষ্টিক ওভাৰী চিণ্ড্ৰম থাকে, অথবা থাইৰয়েডৰ সমস্যা থাকে, তেনে ক্ষেত্ৰত হৰমনৰ তাৰতম্য বেছি হয়৷ তেতিয়া শৰীৰৰ নিম্নভাগত মেদ জমা হ’বলৈ আৰম্ভ কৰে৷ অত্যধিক জাংক ফুড, পেকেটজাত খাদ্য বেছিকৈ খোৱাৰ ফলত কলেষ্টৰেল আৰু ট্ৰাইগ্লিচাৰাইডৰ মাত্ৰা বৃদ্ধি হৈ এনে সমস্যা হ’ব পাৰে৷ যিসকল মহিলাই কম বয়সৰ পৰা হজমৰ সমস্যা বা মেটাবলিক ডিজঅৰ্ডাৰত ভুগিছে, যিসকলৰ লিভাৰৰ ৰোগ আছে, তেওঁলোকে এই সমস্যা ভোগা দেখা যায়৷ আনহাতে ৰজোনিবৃত্তিৰ সময়ত যদি শৰীৰত কলেষ্টৰেল বেছি জমা হয়, তেনে ক্ষেত্ৰত এই সমস্যা হ’ব পাৰে৷ সাধাৰণতে দেখা গৈছে যে পঞ্চাছৰ ঊৰ্ধবৰ বেছিভাগ মহিলাই লিপেডেমাত ভুগিছে৷ সুষম ডায়েট, নিয়মিতভাৱে শৰীৰচৰ্চা কৰিলে এই সমস্যা সমাধান হ’ব পাৰে৷
