বহু প্ৰাচীন কালৰে পৰা মুলতানী মাটি ৰূপচৰ্চাত ব্যৱহাৰ কৰি অহা হৈছে৷ মুলতানী মাটিৰে তৈয়াৰী ফেচপেকে অসাধাৰণ কাম কৰে৷ এই ফেচপেক আপুনি নিয়মিতভাৱে মুখত লগালে ছাল উজ্জ্বল হৈ ছালৰ সতেজতা বৃদ্ধিত অৰিহণা যোগায়৷ জানো আহক ছালৰ উজ্জ্বলতা বঢ়াবলৈ মুলতানী মাটি কিদৰে ব্যৱহাৰ কৰিব৷ শুষ্ক ছালৰ বাবে মুলতানী মাটি ব্যৱহাৰ কৰিব পাৰে৷ ই অসাধাৰণ এক্সফলিয়েটৰ হিচাপে কাম কৰে৷ যিসকলৰ ছাল ৰুক্ষ, শুকান, তেওঁলোকে ছালত মুলতানী মাটি ব্যৱহাৰ কৰক৷ ইয়াৰ বাবে মুলতানী মাটিৰ সৈতে নাৰিকল তেল মিহলাই মুখত লগালে ছালৰ শুষ্কতা ৰোধ কৰে৷
অফিচ, বজাৰ-সমাৰ কৰি বাহিৰৰ পৰা অহাৰ পাছত মুলতানী মাটি লগাই মুখখন ধুই পেলালে ছালখনৰ ধূলি-মাকতি, ময়লা আদি দূৰ কৰাত সহায় কৰে৷
যিসকলৰ ছালখন কম বয়সতে বেছি বয়সীয়া যেন দেখি, অকালবাৰ্ধক্যত ভুগিছে, তেনে লোকে মুলতানী মাটি ব্যৱহাৰ কৰিলে যথেষ্ট সুফল পাব৷
গাখীৰৰ লগত মুলতানী মাটি মিহলাই এটা পেক প্ৰস্তুত কৰক৷ এই মিশ্ৰণটো মুখত লগালে মুখত পৰা ক’লা দাগ নিমিষতে নাইকিয়া কৰাৰ লগতে ছালখন একেবাৰে নৰম হৈ পৰিব৷
মুলতানী মাটিত অলপ মৌ মিহলাই এটা মিশ্ৰণ তৈয়াৰ কৰক৷ এই মিশ্ৰণটো সপ্তাহত তিনিবাৰ মুখত লগাওক৷ যিসকলৰ ছালখন অতি শুকান, তেওঁলোকৰ কাৰণে এই মিশ্ৰণটো অত্যন্ত কাৰ্যকৰী হিচাপে কাম কৰে৷
পকা অমিতা ছালৰ বাবে যথেষ্ট উপকাৰী৷ যিসকলৰ ছালৰ ক’লা দাগ পৰিছে, শুষ্কতা অধিক, ছালখনৰ ক্ষতস্থানৰ দাগ আছে, তেনে মুখত মুলতানী মাটি আৰু পকা অমিতাৰ পেক লগাতে সুফল পাব৷ ইয়াৰ বাবে পকা অমিতা আৰু মুলতানী মাটিৰ এটা পেষ্ট তৈয়াৰ কৰি মুখ, গল, পিঠি, কান্ধ, বাহু, কিলাকুটি আদিত লগালে ক’লা দাগ, ক্ষতস্থানৰ দাগ আদি নাইকিয়া হয়৷
কলত প্ৰচুৰ পৰিমাণে ভিটামিন-চি থাকে, যি ছালৰ সুন্দৰতা অটুট ৰাখে৷ পকা কল এটাৰ সৈতে মুলতানী মাটিৰে এটা পেষ্ট প্ৰস্তুত কৰি লওক৷ এসপ্তাহ সম্পূৰ্ণকৈ মুখত লগাওক৷ দেখিব মুখত পৰা বাৰ্ধক্যৰ চিন, বলিৰেখা আদি নোহোৱা হৈ গৈছে৷
