কৰ’না ভাইৰাছৰ বিৰুদ্ধে যুঁজিবলৈ আপুনি শাৰীৰিক আৰু মানসিকভাৱে সুস্থ হ’বই লাগিব। পুষ্টিকৰ তথা কেতবোৰ বিশেষ আহাৰে কৰ’নাৰ বিৰুদ্ধে কৰা এই যুঁজখনত জয়ী হ’বলৈ আপোনাক সহায় কৰিব পাৰে। দৈনিক গ্ৰহণ কৰক এই ১০ বিধ বিশেষ আহাৰ-
১) পুৱা খালী পেটত এচামুচ কেঁচা হালধিৰ ৰস একাপ পানীৰ সৈতে মিহলাই খাওক।
২) ৰাতিপুৱা এচামুচ এল’ভেৰাৰ ৰস অথবা এচামুচ আমলখিৰ ৰস এগিলাচ পানীৰ সৈতে মিহলাই সেৱন কৰক।
৩) দিনটোত দুই-তিনিকাপ আদা আৰু জালুক দিয়া চাহ সেৱন কৰক। যদি সুবিধা হয় সেই চাহত ইলাছি আৰু দালচেনিও পেলাই ল’ব পাৰে।
৪) পুৱাৰ ভাগত এটা বা দুটা কেঁচা নিমপাত চোবাই খাওক।
৫) দিনটোৰ যিকোনো এটা সময়ত তিনি-চাৰিটা কেঁচা তুলসী পাত চোবাই খাওক।
৬) নৰসিংহৰ পাত দাইল অথবা ভাজিত পেলাই খোৱাৰ অভ্যাস কৰক।
৭) যদি সম্ভৱ হয় দিনটোত এটা দাব নাৰিকলৰ পানী খাওক।
৮) C-ভিটামিনযুক্ত ফল যেনে নেমু, মৌচম্বি, কমলা টেঙা আমলখি আদি সেৱন কৰক।
৯) বিশুদ্ধ পানী খোৱাৰ অভ্যাস কৰক। পানীখিনি সামান্য গৰম কৰি ল’লে ভাল। সহ্য কৰিব পৰাকৈ এগিলাচ গৰম পানী পুৱাই খোৱা উচিত। ৰাতি শুবৰ সময়ত খোৱা পানীখিনিও গৰম পানী হ’লে ভাল।
১০) যদি সম্ভৱ হয় দিনটোত আম, আপেল, মধুৰিআম বা তেনে কোনো ফল খোৱাৰ অভ্যাস কৰক।
ইয়াৰ লগতে আৰু এটা কথা যোগ দিয়াটো বিশেষ দৰকাৰ– সেয়া হৈছে এটা শক্তিশালী মনৰ সাধনা কৰা। শক্তিশালী মন এটাৰ অবিহনে কোনো লোকেই জীৱনৰ লক্ষ্যত উপনীত হ’ব নোৱাৰে। কৰ’নাৰ বিৰুদ্ধে যুঁজিবলৈও আপোনাক দৰকাৰ এটা শক্তিশালী মনৰ। জনাথন চুইফটে কৈছিল– পৃথিৱীৰ শ্ৰেষ্ঠ চিকিৎসকসকল হ’ল– চিকিৎসক আহাৰ, চিকিৎসক বিশ্ৰাম আৰু চিকিৎসক প্ৰফুল্লতা। আনন্দ-ফূৰ্তি তথা মনোৰঞ্জনেৰে মনটোক সজীৱ কৰি ৰাখিবলৈ চেষ্টা কৰক। এই স্ফূৰ্তিয়ে আপোনাৰ মনটোক শক্তিশালী কৰি ৰাখিবলৈ সহায় কৰিব। গভীৰ প্ৰত্যাশাৰে ভাবক যে এই পৃথিৱীত আপুনি জীয়াই থাকিব লাখিব। এই বসুন্ধৰাত আপোনাৰ এতিয়া কৰিবলগীয়া আছে অনেক সুন্দৰ সুন্দৰ কাম। যদি আপোনাৰ আশা পবিত্ৰ আৰু গভীৰ, তেন্তে সেই আশাৰ মৃত্যু নাই। এষাৰ কথা আছে– আশাৰ ওচৰত ভাগ্যও পৰাজিত হয়।
