কেতিয়াবা বহুবাৰ উঠা-বহা কৰাৰ সময়ত, এঙামূৰি কাঢ়োতে অথবা কেতিয়াবা ৰাতি শুই থাকোঁতে হঠাৎ ভৰিৰ নাৰ্ভ টানি ধৰা দেখা যায়৷ দেখাত ই তেনেই সাধাৰণ সমস্যা যদিও নাৰ্ভ টানি ধৰিলে অত্যন্ত বিষ হোৱা পৰিস্থিতিৰ সন্মুখীন হ’বলগীয়া হয়৷ অকল এয়াই নহয়, বিষ হোৱাৰ লগতে কেতিয়াবা ঠাইডোখৰ ফুলি উঠাও দেখা যায়৷ সাধাৰণতে দেহত পানীৰ অভাৱ, দুৰ্বলতা, তেজত ছডিয়াম আৰু পটেচিয়ামৰ অভাৱ, মাংসপেশীসমূহলৈ পৰ্যাপ্ত মাত্ৰাত তেজৰ চলাচল নোহোৱা, শোৱাৰ ভংগী বেয়া হোৱা আৰু স্নায়ুৰ দুৰ্বলতাৰ ফলতে নাৰ্ভ টানি ধৰে৷ এনেকুৱা সমস্যাই দেখা দিলে আপুনি কেইটামান ঘৰুৱা উপায় অৱলম্বন কৰি সেই সময়খিনিত অলপ হ’লেও সকাহ পাব পাৰে৷(১) যদি আপোনাৰ বাওঁভৰিৰ নাৰ্ভ টানি ধৰিছে, তেন্তে সোঁহাতৰ আঙুলিৰে কাণৰ তলৰ অংশত জোৰত টিপি দিয়ক৷ একেদৰে সোঁভৰিৰ নাৰ্ভ টানি ধৰিলে বাওঁহাতৰ আঙুলিৰে কাণৰ তলৰ অংশ জোৰকৈ টিপি দিব লাগে৷
(২) নাৰ্ভ টানি ধৰিলে বৰফেৰে সেই অংশত অলপ সময় ধৰি থাকিলে আৰাম পোৱা যায়৷
(৩) নাৰ্ভ টানি ধৰা সমস্যাত যিকোনো তেল অলপ গৰম কৰি লৈ লাহে লাহে ঠাইডোখৰ মালিচ কৰিব লাগে৷
(৪) ৰাতি শুই থাকিলে হঠাৎ ভৰিৰ নাৰ্ভ কোঁচ খাই গ’লে ভৰিৰ বুঢ়া আঙুলিটো কিছু সময় টানি ধৰিলে আৰাম পোৱা যায়৷
(৫) ছডিয়ামৰ অভাৱতো কেতিয়াবা নাৰ্ভ টনা সমস্যাত ভুগিবলগীয়া হয়৷ এনে অৱস্থাত সামান্য পৰিমাণৰ নিমখ হাতত লৈ চেলেকিলে সুফল পোৱা যায়৷
