ভীমকলৰ বিষয়ে আমি সকলোৱে জানো৷ দেখিবলৈ কিছু ডাঙৰ কলটোৰ ভিতৰত থাকে অসংখ্য গুটি৷ এষাৰ কথা আছে–
পুহত কল মাঘত জল
দেহত পাবা হাতীৰ বল।
পকা ভীমকল পুহ মাহত নিয়মিতভাৱে খালে গাত হেনো ভীমৰ সমান বল হয়৷ ভীমকলৰ অসীম পুষ্টিগুণৰ বাবে আজিকালি শিশুৰ বাবে ভীমকলৰ পৰা ভীমভীটা, ভীম পাউডাৰ আদি প্ৰস্তুত কৰি উলিওৱা হৈছে৷ গতিকে ভীমকলৰ আন কিছুমান উপকাৰিতাৰ বিষয়েও জানো আহক৷
[১] শীতকালত প্ৰতিদিনে এটাকৈ ভীমকল খালে শৰীৰৰ শ্ৰীবৃদ্ধি হয়৷
[২] পকা ভীমকলত যথেষ্ট পৰিমাণে পটাচিয়াম থাকে৷ সেই কাৰণে উচ্চ ৰক্তচাপ নিয়ন্ত্ৰণত ভীমকল উপকাৰী৷
[৩] শৰীৰৰ ওজন বৃদ্ধি কৰিবৰ কাৰণে পকা ভীমকলৰ মঙহালৰ লগত বুট খাব লাগে৷ এনেদৰে খোৱাৰ প্ৰায় ১০-১৫ মিনিটৰ পাছত পানী খালে দেহৰ ওজন বৃদ্ধি পায়৷
[৪] ভীমকলৰ পচলা খালে কোষ্ঠকাঠিন্যতা দূৰ হয়৷
[৫] ৰক্তহীনতাত ভোগা লোকৰ বাবে ভীমকলৰ ডিল অতি উপকাৰী৷
[৬] টোপনি কম হ’লে পকা ভীমকলৰ গুটি আঁতৰাই এগিলাচ গাখীৰত মিহলাই খালে সুফল পোৱা যায়৷
গতিকে পকা ভীমকল দৈনিক এটাকৈ সেৱন কৰি শৰীৰটোক সুস্থ-সবল কৰি ৰখাৰ লগতে ৰোগমুক্ত কৰি ৰাখিব পাৰি।
