কিছু কিছু কেঞ্চাৰৰ বাহ্যিক প্ৰকাশ থাকে৷ কোনোধৰণৰ আলচাৰ বা ঘা, ৰক্তক্ষৰণ আদি৷ সেইবোৰৰ অধিকাংশৰ ক্ষেত্ৰতে কেঞ্চাৰ বুলি ভবা নাযায়৷ যাৰ ফলত এই সৰু সৰু সমস্যাবোৰ উপযুক্ত চিকিৎসাৰ অভাৱত পাছত কেঞ্চাৰৰ ভয়ানক পৰ্যায়ত উপনীত হয়৷ তেতিয়া এই ৰোগ ধৰা পৰিলেও আৰু একো কৰিবলগীয়া নাথাকে৷
ভাৰতবৰ্ষত অৰেল কেঞ্চাৰত আক্ৰান্ত হোৱাৰ হাৰ সৰ্বাধিক৷ ধঁপাতজাত সামগ্ৰী পাণ, তামোল, গুটখা, ছুপাৰি এইক্ষেত্ৰত দায়ী৷ মুখৰ ভিতৰত কোনো সৰু ক্ষতস্থান অৱহেলা কৰিলে মাৰাত্মক হ’ব পাৰে৷ আনহাতে পুৰুষৰ লগতে মহিলাসকলো ধূমপান নিচাগ্ৰস্ত৷ সকলোৱে জানো যে চিগাৰেট সেৱন কেঞ্চাৰৰ প্ৰধান কাৰণ৷ তথাপিও চিগাৰেট ত্যাগ কৰিবলৈ বাদ নিদিয়ে৷ আনকি দেখা যায়. কাহ হোৱা, শ্বাসকষ্টৰ সমস্যাত ভোগা সমস্যা হ’লেও এই অভ্যাস বাদ নিদিয়াৰ বাবে মাৰাত্মক ৰূপ লয়৷ গেষ্টি˜কৰ সমস্যা, পেটৰ বিষ, কঁকালৰ ব্যথা বা তলপেটৰ বিষ হ’লেও ভাবি লয় গেছৰ সমস্যা বুলি৷ প্ৰতিকাৰৰ বাবে ঔষধৰ দোকানৰ পৰা পেইন কিলাৰ আনি খাবলৈ লয়৷ এইদৰে বহুদিন ভুগি থকাৰ সমস্যাই পাছলৈ গুৰুতৰ ৰূপ লয় আৰু তেনে অৱস্থাত আন চিকিৎসা নাথাকে৷ আনহাতে অভাৰিয়ান কেঞ্চাৰ হ’লে একেবাৰে চুপচাপ আৰম্ভ হয়৷ এই ক্ষেত্ৰত সাধাৰণ লক্ষণ হ’ল দীৰ্ঘদিনীয়া গেছৰ সমস্যা৷ ইয়াৰ উপৰি মহিলাসকলৰ ক্ষেত্ৰত গোপন অংগ বা স্তনৰ কিবা সমস্যা হ’লে লুকুৱাই ৰাখে৷ স্তনত কোনো টান টিউমাৰ, নিপলৰ কোনো বিশেষ পৰিৱৰ্তন হোৱা,স্তনৰ বিষ আদি হ’লে প্ৰথমে চিকিৎসাৰ অভাৱত পাছলৈ কেঞ্চাৰলৈ গতি কৰে৷ আনহাতে শৌচৰ লগত তেজ যোৱাটো কোষ্ঠকাঠিন্যৰ বা অৰ্শৰ সমস্যা বুলি সহজে লোৱা হয় আৰু সেইমতে অৰ্শৰ চিকিৎসা কৰা হয়৷ কিন্তু এইদৰে হোৱা টিউমাৰে পাছত কেঞ্চাৰৰ ৰূপ লয়৷ সেয়ে এইধৰণৰ সৰু অথচ ভয়ানক সমস্যা হ’লে অৱহেলা নকৰি ততালিকে চিকিৎসকৰ পৰামৰ্শ লোৱা উচিত৷