২০৫০ চনৰ ভিতৰত ভাৰতত যথেষ্টসংখ্যক লোক ওজনাধিক্য অৰ্থাৎ শকত হোৱাৰ সমস্যাত ভূগিব৷ শৰীৰৰ ওজন বৃদ্ধিৰ সমস্যা বাঢ়ি যোৱা মানুহৰ সংখ্যা ৪৪০ মিলিয়নতকৈও বেছি হ’ব পাৰে৷ এই কথা জানিবলৈ দিছে আন্তৰ্জাতিক মেডিকেল জাৰ্নাল দ্য লেনটেচত প্ৰকাশিত এক প্ৰতিবেদনৰ জৰিয়তে৷ গৱেষণা অনুযায়ী ২০৫০ চনত ভাৰতত প্ৰায় ২১৮ মিলিয়ন পুৰুষ আৰু ২৩১ মিলিয়ন মহিলাই ওজনাধিক্য আৰু স্থূলতাত ভুগিব পাৰে৷ এই সংখ্যাৰ হাৰ হিচাপে চীনৰ পাছতে দ্বিতীয় স্থানত অৱস্থান কৰিব ভাৰতে৷ ইয়াৰ পাছতে ক্ৰমে যুক্তৰাষ্ট্ৰ, ব্ৰাজিল আৰু নাইজেৰিয়াই স্থান লাভ কৰিছে৷ ভাৰতৰ চিকিৎসা গৱেষণা সংস্থা ইণ্ডিয়ান কাউন্সিল অব মেডিকেল ৰিছাৰ্চসহ বিশ্বৰ বিভিন্ন সংস্থাৰ গৱেষকে যুটীয়াভাৱে গ্ল’ৱেল বাৰ্ডেন অব্ ডিজিজ ষ্টাডি ২০২১ নামৰ এই গৱেষণাটো কৰিছিল৷ এই গৱেষণাৰ পৰা জনা গৈছিল ইতিমধ্যে ২০২১ চনত বিশ্বৰ প্ৰায় আধাসংখ্যক প্ৰাপ্তবয়স্ক মানুহে, যিসকলৰ বয়স ২৫ বছৰৰ ওপৰত, ওজনাধিক্যত ভুগিছে৷ এই সংখ্যা এক বিলিয়ন পুৰুষ আৰু এক বিলিয়নৰো বেছি মহিলা৷ এই সংখ্যা প্ৰায় ১৮০ মিলিয়ন, যাৰ মাজত ৮১ মিলিয়ন পুৰুষ আৰু ৯৮ মিলিয়ন মহিলা আছে৷ আনহাতে তথ্য অনুসৰি ২০৫০ চনৰ ভিতৰত এই সংখ্যা বিশ্বব্যাপী ৩.৮ বিলিয়ন হোৱাৰ সম্ভাৱনা আছে৷ যি বৰ্তমান সময়ত সম্ভাব্য বৈশ্বিক প্ৰাপ্তবয়স্ক জনসংখ্যাৰ অৰ্ধেকৰেও বেছি হ’ব৷ আনহাতে গৱেষণাত জানিবলৈ দিয়া মতে ২০৫০ চনৰ ভাৰতত ৫ ৰপৰা ১৪ বছৰ বয়সীয়াৰ ভিতৰত প্ৰায় ১৬ মিলিয়ন ল’ৰা আৰু ১৪ মিলিয়ন ছোৱালীয়ে ওজনাধিক্যত আক্ৰান্ত হ’ব পাৰে৷ স্থূলতাৰ এই অভূতপূৰ্ব বিশ্বব্যাপী মহামাৰীয়ে সমাজৰ বাবে সাংঘাতিক ধৰণৰ ব্যৰ্থতাৰ প্ৰতিচ্ছবি হিচাপে চিহ্নিত হৈছে৷ ভাৰতত ওজন বৃদ্ধিৰ সমস্যা নিৰাময় আহবান জনাই সম্প্ৰতি প্ৰধান মন্ত্ৰী নৰেন্দ্ৰ মোদীয়ে তেওঁৰ ৰেডিঅ’ অনুষ্ঠান ‘মন কী বাত’ত এই বিষয়ে উদ্বেগ প্ৰকাশ কৰিছে৷ আনহাতে বিশেষজ্ঞই জানিবলৈ দিছে যে ওজনাধিক্য কেৱল শাৰীৰিক ওজন বৃদ্ধিৰে নহয়, এই সমস্যাৰ বাবে হৃদৰোগ, মেটাবলিক সমস্যা, হাড়ৰ স্বাস্থ্যৰ সমস্যা, বন্ধ্যাত্ব তথা কেঞ্চাৰৰ দৰে মাৰাত্মক সমস্যাৰো সৃষ্টি কৰিব পাৰে৷
