আজিকালি সকলো লোকৰে বদহজম হোৱা দেখা পাওঁ৷ কৰ্মময় ব্যস্ত জীৱনত আমাৰ খাদ্য গ্ৰহণৰ ক্ষেত্ৰত যথেষ্ট তাৰতম্যই দেখা দিয়ে৷ অনিয়মিত খাদ্য তালিকাৰ বাবে আমাৰ শৰীৰত যথেষ্ট বিসংগতিয়ে দেখা দিয়ে৷ খোৱাৰ ক্ষেত্ৰত কোনোধৰণৰ নিৰ্দিষ্ট সময় নোহোৱাৰ বাবে আজি সকলোৰে ক্ষেত্ৰতে এই বদহজমৰ সমস্যা বাঢ়ি গৈ আছে৷ খাবলৈ মন নোযোৱা, গা দুৰ্বল লগা, সৰু কথাতে খং উঠা, পেটত গেছ জমা হোৱা আদি এইধৰণৰ লক্ষণবোৰে আমাৰ শৰীৰত ক্ৰিয়া কৰে৷ গতিকে আমি ইয়াৰ পৰা নিৰাময় পাবলৈ কিছুমান সাৱধানতা মানি চলাটো নিতান্তই জৰুৰী৷ যদিহে আমি পুৱাই ময়ূৰাসন, পদাহস্তাসন, বজ্ৰাসন, অগ্নিমুদ্ৰা, অগ্নিপ্ৰাণায়াম আৰু সন্ধিয়া অগ্নিসাৰমুদ্ৰা, দীৰ্ঘপ্ৰণাম, যোগাসন, ভূজংগাসন¸ কৰোঁ, তেন্তে এই ৰোগৰ পৰা হাত সাৰি থাকিব পাৰোঁ৷ তদুপৰি বদহজম হৈ পাতলীয়া শৌচ হ’লে সেউজীয়া শাক-পাচলিৰ চুপ আৰু পুৰণি চাউলৰ সিদ্ধ ভাত খোৱাটো প্ৰয়োজন৷ শুকান নাৰিকল বা কেঁচা নাৰিকল পাণৰ সৈতে খালে এই ৰোগৰ পৰা কিছু পৰিমাণে সকাহ পোৱা যায়৷ ক’লা নিমখ পানীৰ সৈতে মিহলাই খালেও এই ৰোগ উপশম হয়৷ বদহজমৰ সমস্যাত অধিক আহাৰ খোৱাটো অনিষ্টকাৰী৷ অত্যন্ত মানসিক চাপো বদহজমৰ অন্যতম কাৰণ৷ মাহজাতীয় আহাৰ খোৱাটো এই ৰোগৰ বাবে অনুপোযোগী৷
