ৰমজান মাহৰ ইফটাৰৰ পাছত আপোনাৰ একাপ সতেজ চাহ খাবলৈ মন যায় নেকি? কাৰো কাৰো ইফটাৰৰ পাছত একাপ চাহ খালেহে যেন পৰম প্ৰশান্তি লাভ কৰে৷ অৱশ্যে ইফটাৰৰ পাছত একাপ চাহ খাবলৈ পালে হয়তো আপোনাৰো ভাগৰুৱা- ক্লান্ত দেহ তথা মনৰ চাহিদা পূৰণ হ’ব৷ ইয়াৰ বাবে চাহ খোৱাটো দৰকাৰ৷ কৰ্মব্যস্ত দিনত দিনটোৰ কিছু সময়ৰ বাবে ক্লান্তি আহিব পাৰে৷ ইফটাৰৰ পাছত শৰীৰ অৱশ বা ভাগৰৰ দৰে অনুভূতি হোৱা অস্বাভাৱিক নহয়৷ এই সময়খিনিত অৰ্থাৎ ইফটাৰৰ পাছত একাপ চাহত চুমুক দিলে আপুনি সতেজ হৈ উঠিব পাৰে৷ দিনৰ কৰ্মব্যস্ততাৰ বাবে বহুতেই দিনত জিৰাবলৈ সময় নাপায়৷ এই সময়ত শৰীৰলৈ সতেজতাৰ অনুভৱ আনিবলৈ আপোনাৰ কাৰণে চাহ পান কৰাটো ইতিবাচক হিচাপে বিবেচিত হ’ব৷ চাহ থকা কেফেইনে শৰীৰৰ ভাগৰ, ক্লান্তি দূৰ কৰাত সহায় কৰে৷ আদা, তেজপাত, ডালচেনি, লং প্ৰভৃতি উপাদানেৰে সুন্দৰভাৱে একাপ চাহ প্ৰস্তুত কৰি সেৱন কৰিলে শৰীৰলৈ সতেজতা আনিব৷ সহজে মছলা অবিহনে অৰ্গেনিক চাহ প্ৰস্তুত কৰি খালে শৰীৰৰ উপকাৰো সাধন হয়৷ যিকোনো খাদ্য খোৱাৰ অন্ততঃ বিশ মিনিটমান পাছত পানী বা পানীয় খোৱা উচিত৷ নহ’লে খাদ্যৰ পৰিপাকত অসুবিধা হয়৷ অৱশ্যে এই পানীয় যদি চাহ হয়, তেন্তে সময়ৰ ব্যৱধান আৰু অলপ বঢ়াই দিব৷ কাৰণ চাহত থকা টেনিনে খাদ্যত থকা আইৰন শোষণ কৰাত বাধা দিয়ে৷ সেয়ে খোৱাৰ এঘণ্টামানৰ পাছত চাহ খোৱা উচিত৷ আনহাতে ইফটাৰৰ পাছত বহুতেই গাখীৰ মিহলি চাহ খাবলৈ পচন্দ কৰে যদিও এই ক্ষেত্ৰত এচিডিটি বা পেট ফুলাৰ দৰে সমস্যাৰ সৃষ্টি কৰিব পাৰে৷ ইয়াৰ উপৰি ইফটাৰৰ পাছত অতিৰিক্ত পৰিমাণৰ চাহ সেৱন কৰা উচিত নহয়৷
