চৰকাৰী চিকিৎসা ব্যৱস্থাত কৰ্কট ৰোগৰ প্ৰ’টন থেৰাপিৰে চিকিৎসা কৰা দেশৰ ভিতৰত প্ৰথম ৰাজ্য হ’ব অসম৷ প্ৰ’টন থেৰাপিৰে কৰ্কট ৰোগৰ চিকিৎসা কৰাৰ বাবে মেচিন সমগ্ৰ ভাৰতত কেৱল এপল’ হস্পিটেল আৰু মুম্বাইৰ টাটা মেম’ৰিয়েল হস্পিটেলতহে আছে বুলি উল্লেখ কৰি তেওঁ সমগ্ৰ ভাৰতৰ ভিতৰত চৰকাৰী চিকিৎসা ব্যৱস্থাত প্ৰথমবাৰৰ বাবে অসমৰ গুৱাহাটীত প্ৰ’টন থেৰাপিৰ ব্যৱস্থা কৰা বুলি মুখ্যমন্ত্ৰীজনে ঘোষণা কৰে৷ বিত্ত মন্ত্ৰী অজন্তা নেওগে বিধানসভাত ২০২৫-২৬ বৰ্ষৰ বাজেট দাখিল কৰাৰ পাছতে এই কথা প্ৰকাশ কৰে মুখ্যমন্ত্ৰী ড॰ হিমন্ত বিশ্ব শৰ্মাই৷ বাজেটৰ পাছতে সংবাদমেলযোগে মুখ্যমন্ত্ৰীজনে এই কথা ঘোষণা কৰে৷ আনহাতে ৰাজ্যৰ মেডিকেল কলেজত এইবাৰ যিসকল নতুন চিকিৎসক আহিব তেওঁলোকক নাৰ্ছিং হোমৰ সলনি মেডিকেল কলেজতে ৰখাৰ ব্যৱস্থা কৰা বুলি তেওঁ কয়৷ ইয়াৰ বাবে তেওঁলোকক চৰকাৰে ঘৰ আৰু গাড়ী দুয়োটাৰ বাবে ঋণ প্ৰদান কৰিব বুলিও ঘোষণা কৰে৷ অধ্যাপকসকলক পদ নাথাকিলেও পদোন্নতি দিয়াৰ ব্যৱস্থা কৰা হ’ব৷ ইয়াৰ উপৰি তেওঁলোকক ৰাষ্ট্ৰীয় আৰু আন্তঃৰাষ্ট্ৰীয় চেমিনাৰলৈ যোৱাৰ ব্যৱস্থাও চৰকাৰেই কৰি দিব বুলিও কয়৷ অসমে ইতিমধ্যে কেইবাটাও মাইলৰ খুঁটি অতিক্ৰম কৰিবলৈ সক্ষম হোৱা বুলি উল্লেখ কৰি তেওঁ কয় যে অসমে ভৱিষ্যতৰ বাবেও চিন্তা কৰি কাম কৰি আহিছে৷ অসমে নিজৰ সম্পদ বৃদ্ধি কৰা বুলিও দাবী কৰে৷ এইবাৰৰ পৰা গৱেষক ছাত্ৰ-ছাত্ৰীকো ২৫ হাজাৰকৈ টকা প্ৰদান কৰিব চৰকাৰে৷ দিব্যাংগ হ’লে ৫০ হাজাৰ টকা প্ৰদান কৰা হ’ব৷ অসমত পূৰ্বৰ তৃপ্তিৰ দৰে খাঁটি সৰিয়হৰ তেলৰ এটা ব্ৰেণ্ড নিৰ্মাণ কৰিব বিচৰাৰ কথা সদৰী কৰি তেওঁ প্ৰতি জিলাত এটাকৈ এফ পি অ’ স্থাপন কৰাৰ পৰিকল্পনা কৰাৰ কথা প্ৰকাশ কৰে৷ বন্য জীৱ-জন্তুৱে বিদ্যুৎ পৰিবাহী তাঁৰত লাগি যাতে প্ৰাণ হেৰুৱাবলগীয়া নহয় তাৰ বাবে চৰকাৰে এইবাৰ ইনচুলেটৰ সংযোজন কৰাৰ কথা ঘোষণা কৰে মুখ্যমন্ত্ৰীজনে৷ হাতীয়ে যাতে প্ৰকৃত খাদ্যৰ অভাৱত ভুগিবলগীয়া নহয় তাৰ বাবে চৰকাৰে নেপিয়েৰ ঘাঁহ লগাব বুলিও তেওঁ কয়৷ হাতীৰ খাদ্যৰ উপৰি এই ঘাঁহৰ পৰা কম্প্ৰেছ বায়’গেছো ওলাব বুলি তেওঁ কয়৷
