আপোনাৰ সন্তানে বিছনাত পেচাব কৰিলে কি কৰিব ?

সৰুতে শিশুসকলে টোপনিতে বিছনাত প্ৰস্ৰাৱ কৰাটো তেনেই সাধাৰণ কথা৷ ইয়াক লৈ বিশেষ একো চিন্তাৰ কাৰণ নাই যদিও বহু ক্ষেত্ৰত ই শিশুৰ বদঅভ্যাসলৈ পৰিণত হ’ব পাৰে৷ লগতে স্নায়ু দুৰ্বলতা তথা বদহজমৰ কাৰণে নাইবা কেতিয়াবা ঠাণ্ডা লগাৰ বাবেও শিশুৱে ৰাতি অচেতন অৱস্থাত প্ৰস্ৰাৱ কৰি দিয়ে৷ আনকি কেতিয়াবা শিশুৱে আঠ-দহ বছৰমান বয়সতো বিছনাত প্ৰস্ৰাৱ কৰে৷ সেয়েহে ইয়াৰ উপযুক্ত সমাধান উলিওৱাটো অতি প্ৰয়োজন৷ ইয়াৰ বাবে আপোনাৰ শিশুটিক কেইটামান অভ্যাস কৰোৱাব পাৰে৷
নিশা শোৱাৰ সময়ত বিছনালৈ যোৱাৰ আগতে এবাৰ ভালদৰে শিশুটিক প্ৰস্ৰাৱ কৰোৱাব লাগে৷
সন্ধিয়া শিশুটিক অধিক পৰিমাণে জুলীয়া আহাৰ নুখুওৱাই ভাল৷
মাজনিশা প্ৰস্ৰাৱ কৰা লাগিলে বাহিৰত উঠাই নিয়াৰ অভ্যাস কৰোৱাব লাগে৷
ইয়াৰ উপৰি শুকান আমলখি, ক’লা জিৰা আৰু মিচিৰি সমপৰিমাণে বটি পানীত মিহলাই শিশুটিক খুৱালে বিছনাত প্ৰস্ৰাৱ কৰা অভ্যাস বন্ধ হয়৷
ক’লা তিল আৰু গুৰ একেলগে মিশ্ৰণ কৰি খুৱালেও শিশুৰ এই বদঅভ্যাস নোহোৱা হয়৷
বিছনাত প্ৰস্ৰাৱ কৰা শিশুক জামুৰ শুকান গুটি ভালদৰে মিহিকৈ বটি এচামুচ পানীৰ লগত কেইদিনমান খুৱালে সুফল পোৱা যায়৷