আপুনি সুগন্ধি অবিহনেই সুবাসিত হৈ থাকিব বিচাৰে নেকি? এটা বিশেষ হৰমনৰ ওপৰত নিৰ্ভৰ কৰে এই প্ৰক্ৰিয়াটো৷ আমি প্ৰত্যেকগৰাকী ব্যক্তিৰে শৰীৰৰ এটা নিজস্ব গোন্ধ থাকে৷ যি গোন্ধ সুগন্ধি লগোৱাৰ পাছতো শৰীৰত থাকে৷ শৰীৰৰ এই প্ৰাকৃতিক গোন্ধটো কিছু সময়ৰ বাবে নোহোৱা কৰিবলৈ আমি গা ধোৱাৰ সময়ত চাবোন, ক্ৰিম, ছেম্পু, বডী ৱাছ লিকিউড আদি ব্যৱহাৰ কৰা যায়৷ এইবোৰে শৰীৰটোক সাৰ্বিক পৰিচ্ছন্নতা বজাই ৰাখে৷ বাকীখিনি ঠিকভাৱে পৰিচালনা কৰে এই বিশেষ হৰমনবিধে৷ এই হৰমনবিধৰ নাম কৰ্টিচেল৷ যাক ষ্ট্ৰেচ হৰমন বুলিও জনা যায়৷ এই হৰমনবিধ মস্তিষ্ক চাপত থাকিলে শৰীৰৰ পৰা নিসৃত হয়৷ পুষ্টিবিদৰ মতে শৰীৰত কৰ্টিচেলৰ মাত্ৰা অতিৰিক্ত বাঢ়ি গ’লে আমাৰ শৰীৰৰ পৰা বেছিকৈ ঘাম বাহিৰ হয়৷ যাৰ পৰা শৰীৰত বেক্টেৰিয়া জমা হৈ দুৰ্গন্ধ ওলোৱাৰ আশংকা থাকে৷ এই সমস্যা নিৰাময় কৰিবলৈ কেৱল শাৰীৰিক পৰিচ্ছন্নতাই নহয়, দৈনন্দিন জীৱন যাপনৰো সলনিৰ প্ৰয়োজন হয়৷ শৰীৰত কৰ্টিচেলৰ মাত্ৰা নিয়ন্ত্ৰণত ৰখা অতি জৰুৰী৷ কাৰণ এই হৰমনে শৰীৰৰ বিপাকৰ হাৰৰ পৰা আৰম্ভ কৰি তেজত শৰ্কৰাৰ মাত্ৰা বৃদ্ধি আনকি শৰীৰত অতিৰিক্ত চাপৰো সৃষ্টি কৰে৷ সেয়ে শৰীৰত অতিৰিক্ত চাপৰ কাৰণে কৰ্টিচেলৰ পৰিমাণ বাঢ়ি গ’লে শাৰীৰিক সুস্থতাৰ মাপকাঠীৰ ভাৰসাম্য নষ্ট হয়৷ যাৰ ফলত শৰীৰৰ পৰা দুৰ্গন্ধ ওলোৱাৰ উপৰি ওজন বৃদ্ধি, হজমৰ সমস্যা আদিবোৰ দেখা দিব পাৰে৷ কিছুমান দৈনন্দিন অভ্যাস সলনি তথা ভাল অভ্যাস ৰুটিনত অন্তৰ্ভুক্ত কৰিলে কৰ্টিচেলৰ ক্ষৰণৰ মাত্ৰাক নিয়ন্ত্ৰণ কৰিব পাৰে৷ পুৱাই পোন্ধৰ মিনিটমান দেহৰ ৰ’দ লগাওক৷ এই অভ্যাসে কৰ্টিচেলৰ ক্ষৰণক নিয়ন্ত্ৰণ কৰিব পাৰে৷ স্বাস্থ্যকৰ স্নেহপদাৰ্থ যেনে ভিজোৱা কাদবাদাম, আখৰোট আদি খাবলৈ আৰম্ভ কৰক৷ এইবোৰে হৰমনৰ মাত্ৰা নিয়ন্ত্ৰণ ৰখাত সহায় কৰে৷ পুৱাই অন্ততঃ বিশ মিনিটমান শৰীৰচৰ্চা কৰা অতি জৰুৰী৷ এই অভ্যাসে শৰীৰৰ ৰক্ত সঞ্চালন উন্নত কৰে, মানসিক চাপ কমাই ৰাখে৷ যাৰ ফলত কৰ্টিচেল হৰমন নিয়ন্ত্ৰণত থাকে৷ মেগনেচিয়ামযুক্ত খাদ্য বেছিকৈ খাওক৷ কাৰণ মেগমেচিয়ামে শৰীৰৰ উত্তেজনা কমাই মন-মেজাজ ঠিকে ৰখাত সহায় কৰে৷ কল, কাঠবাদাম, কোমোৰাৰ বীজ আদি খাব পাৰে৷ দৈনিক ৭-৮ ঘণ্টা টোপনি মৰাটো নিতান্তই প্ৰয়োজনীয়৷ পৰ্যাপ্ত মাত্ৰাত পানী সেৱন কৰাটো অতি জৰুৰী৷ কিয়নো বিভিন্ন সময়ত শৰীৰত পানীৰ পৰিমাণ কমি গ’লেও তাৰ পৰা দুৰ্গন্ধ বাহিৰ হ’ব পাৰে৷