অসমৰ লগতে গুৱাহাটী মহানগৰীতো ৰাজ্য প্ৰশাসনে এবাৰ ব্যৱহাৰযোগ্য প্লাষ্টিক নিষিদ্ধ কৰিছিল যদিও সকলো যেন ফুটুকাৰ ফেনত পৰিণত হ’ল৷ চৰকাৰৰ সকলো নিৰ্দেশনা ভৰিৰে মোহাৰি বজাৰত সহজলভ্য হৈ পৰিল ছিংগল ইউজ প্লাষ্টিকৰ ব্যৱহাৰ৷ ব্যৱসায়িক প্ৰতিষ্ঠানকে কওক বা বজাৰতে কওক কোনোধৰণৰ বাধা নামানি পুনৰ আগৰ লেখীয়াকৈ প্লাষ্টিকৰ ব্যৱহাৰ হোৱা দেখা গৈছে৷ আইন অমান্য কৰি এতিয়া নিৰ্বিঘ্নে চলাই হৈছে ছিংগল ইউজ প্লাষ্টিকৰ বেগ, মোনা, ঠোহা, বটল আদি৷ প্লাষ্টিক ৱেষ্ট মেনেজমেণ্ট আইন-২০২১ৰ অধীনৰ প্ৰদূষণ নিয়ন্ত্ৰণ পৰিষদে জাৰি কৰা সকালো নিষেধাজ্ঞাক বুঢ়া আঙুলি দেখুৱাই সৰু-বৰ ব্যৱসায়িক প্ৰতিষ্ঠানে চলাই গৈছে ছিংগল ইউজ প্লাষ্টিকৰ প্ৰচলন৷ জনস্বাস্থ্য তথা পৰিৱেশৰ প্ৰতি ভাবুকিৰ সৃষ্টি কৰা এইধৰণৰ ছিংগল ইউজ প্লাষ্টিকৰ সামগ্ৰী দোকান, বজাৰবোৰত সহজে উপলব্ধ হৈ পৰিছে৷ এইবোৰ সকলো দেখিও যেন নেদেখাৰ ভাও জুৰিছে ৰাজ্যৰ প্ৰদূষণ নিয়ন্ত্ৰণ পৰিষদে৷ কেৱল নে নিষেধাজ্ঞা জাৰি কৰিয়েই সকলো দায়িত্ব সামৰিছে ৰাজ্যৰ প্ৰদূষণ পৰিষদ নামৰ বিভাগটোৱে৷ উল্লেখ্য যে প্লাষ্টিক মেনেজমেণ্ট আইন-২০২১ৰ অধীনত প্ৰদূষণ নিয়ন্ত্ৰণ বিভাগে এক নিৰ্দেশনাযোগে যোৱা এক জুলাইৰ পৰা ছিংগল প্লাষ্টিকৰ সামগ্ৰীৰ ব্যৱহাৰৰ ক্ষেত্ৰত বাধা আৰোপ কৰিছিল৷ প্ৰদূষণ পৰিষদৰ উক্ত নিৰ্দেশনাত কোৱা হৈছিল যে এক জুলাই ২০২২১ পৰা কোনো ব্যৱসায়িক প্ৰতিষ্ঠান প্লাষ্টিকৰ বেগ, মোনা, দোকান. নিমন্ত্ৰণী পত্ৰ, চিগাৰেটৰ পেকেট, মম আদি ব্যৱহাৰ কৰিব নোৱাৰিব৷ পৰিষদৰ তৰফৰ পৰা কেৱল ৭৫ মাইক্ৰ’নতকৈ ডাঠ পিভিচি পেপাৰহে ব্যৱহাৰ কৰিবলৈ অনুমতি দিছিল৷ কিন্তু পৰিষদে দিয়া উপৰিউক্ত নিৰ্দেশনাৰ দিয়াৰ পাছতেই সকলো প্ৰহসনত পৰিণত হ’ল৷ এতিয়া বজাৰত মুকলিলৈয়ে ব্যৱসায়িক প্ৰতিষ্ঠানে হওক বা মাছ-মাংসৰ দোকানীয়েই হওক মুক্তভাৱে ব্যৱহাৰ কৰি আছে ছিংগল ইউজ প্লাষ্টিকৰ সামগ্ৰী৷ ইয়াৰ বাবে কিন্তু চৰকাৰক জগৰীয়া কৰিলে নহ’ব৷ সমানে দায়ী জনসাধাৰণেও৷ এনে ঘটনাও ঘটা দেখা গৈছে যে বজাৰত বস্তু কিনাৰ পাছত দোকানীয়ে প্লাষ্টিকৰ বেগ নিদিলে তৰ্কযুদ্ধ কৰাও দৃষ্টিগোচৰ হৈছে৷ এটা কথা ঠিক যে প্লাষ্টিকৰ সামগ্ৰী ব্যৱহাৰৰ ক্ষেত্ৰত জনসাধাৰণ যদি সজাগ বা সচেতন নহয়, অদূৰ ভৱিষ্যতে ভয়াৱহ ভৱিষ্যতৰ সন্মুখীন হ’বলৈ বাধ্য হ’ব লাগিব৷
