আমি জানো যে ষ্ট্ৰ’ক সাধাৰণতে বয়স বঢ়াৰ লগে লগে হয়৷ অনিয়ন্ত্ৰিত ডায়েবেটিছ, উচ্চ ৰক্তচাপ আৰু তেজত কলেষ্টৰেলৰ সমস্যা এইসমূহ কাৰণৰ লগতে বেছি বয়সত ষ্ট্ৰ’ক হয়৷ আনহাতে কিছু কিছু ক্ষেত্ৰত শিশুৰ মাজতো ষ্ট্ৰ’ক হ’ব পাৰে৷ গৱেষণাত দেখা গৈছে যে প্ৰতি দহ লাখ শিশুৰ ভিতৰত দুই দশমিক পাঁচৰ পৰা তেৰটি শিশু ষ্ট্ৰ’কত আক্ৰান্ত হ’ব পাৰে৷ এই শিশুৰ ষ্ট্ৰ’কৰ কাৰণসমূহৰ ভিতৰত প্ৰধানকৈ হৃদপিণ্ডৰ জন্মগতভাৱে ছিদ্ৰ থকা বা ভালভৰ ছিদ্ৰৰ সমস্যা থাকিলে তাৰ পৰা ৰক্তনলীৰ থ্ৰম্বাছ মস্তিষ্কলৈ গৈ ৰক্তনলী বন্ধ হৈ ষ্ট্ৰ’ক হ’ব পাৰে৷ মস্তিষ্কৰ ৰক্তনলীৰ জন্মগত ত্ৰুটী থাকিলে শিশুৰ ষ্ট্ৰ’ক হ’ব পাৰে৷ আনহাতে এনিউৰিজম, এ ভি এম, ময়াময়া আদি ৰোগ থাকিলে কম বয়সতে ষ্ট্ৰ’ক হ’ব পাৰে৷ তেজ সৰবৰাহত বাধাৰ সৃষ্টিৰ জন্মগত সমস্যা থাকিলে শিশুসকলৰ ষ্ট্ৰ’ক হ’ব পাৰে৷ এই ক্ষেত্ৰত তেজৰ ঘনত্ব বাঢ়ি গৈ তেজ জমাৰ প্ৰৱণতা বাঢ়ি যায়, যেনে– চিকেল চেল ডিজিজ৷ আৰু বহু কাৰণত শিশুৰ ষ্ট্ৰ’ক হ’ব পাৰে৷ ইয়াৰ ভিতৰত মস্তিষ্কৰ ইনফেকশ্যন [মেনিনজাইটিছ, এনকেফেলাইটিছ]৷ জন্মৰ সময়ত মূৰত পোৱা আঘাত, দীৰ্ঘ সময়ত পৰিচৰ্যাৰ অভাৱত আই চি ইউত ভৰ্তি থকা৷ উল্লেখ্য যে ষ্ট্ৰ’কৰ লক্ষণ সকলো বয়সৰ ক্ষেত্ৰতে একে৷ হঠাৎ মুখ বেঁকা হোৱা, কথা লাগি ধৰা, অথবা এটা ফালৰ হাত বা ভৰি অৱশ হোৱা আদি ষ্ট্ৰ’কৰ লক্ষণ৷ সেয়ে এইধৰণৰ ষ্ট্ৰ’কৰ লক্ষণ দেখা দিলেই দ্ৰুততাৰে মূৰৰ চিটিস্কেন বা এম আৰ আই কৰাটো জৰুৰী৷ হৃদপিণ্ডৰ যিকোনো জন্মগত ছিদ্ৰ বা ভালভৰ সমস্যা নিৰ্ণয়ৰ কাৰণে ই চি ডি, কাকাৰ্ডিঅ’গ্ৰাম, বুকুৰ এক্স ৰে পৰীক্ষা কৰিব লাগে৷ প্ৰয়োজনীয় ক্ষেত্ৰত ৰক্তনলীৰ জন্মগত সমস্যা নিৰ্ণয়ৰ মগজুৰ এনজিঅ’গ্ৰাম কৰাৰ প্ৰয়োজন হ’ব পাৰে৷