ঘৰ আৰু বাহিৰৰ কাম চম্ভালিবলৈ একো উৱাদিহ নোপোৱা হৈছে৷ কাম বোজাই থানথিন নোহোৱা কৰিছে৷ কাম ব্যস্ততাৰ পাছতো যিকণ সময় ওলায়, সেইকণ বিভিন্ন পৰিকল্পনা কৰিলেও ভাগৰে হেঁচা মাৰি ধৰেহি৷ তাৰ মাজতে মানসিক উদ্বেগ, উদ্বিগ্নতা এৰাব নোৱৰা সমস্যা হিচাপে দেখা দিছে৷ মুঠতে কোনো কামতে মন বহুৱাব নোৱৰাৰ দৰে হৈছে৷ ইয়াৰ পৰা সকাহ পাবলৈ যোগাসন কৰাৰ অভ্যাস গঢ় দিয়ক৷ যোগাসনৰ ভিতৰত নিয়মিতভাৱে তাডাসন কৰিলে এইসমূহ সমস্যা সমাধান হয়৷ শৰীৰ তথা মন উন্নত কৰি ৰখাত তাডাসনে সহায় কৰে৷ শৰীৰৰ গঠন, ভংগী ঠিক কৰাৰ কাৰণে এই আসন বেছ কাৰ্যকৰী৷ ইয়াৰ উপৰি দেহৰ ভাৰসাম্য ৰক্ষা কৰাত সহায় কৰে তাডাসনে৷ বাঢ়ি অহা শিশুৰ ক্ষেত্ৰত এই আসন কৰাৰ অভ্যাস কৰালে উচ্ছতাৰ ওপৰত বিশেষ প্ৰভাৱ পৰে৷ এই আসনে স্নায়ুৰ উত্তেজনা প্ৰসমিত কৰে আৰু মানসিক চাপ কমোৱাত সহায় কৰে৷
কিদৰে কৰিব তাডাসন ঃ- সংস্কৃতত তাডা মানে হ’ল পৰ্বত৷ অৰ্থাৎ এই আসন কৰিলে দেহৰ ভংগী দেখাত পৰ্বতৰ দৰে হয়৷ ইংৰাজীত যাক মাউণ্টেন পজ বুলি কোৱা হয়৷ এই ঐসন কৰিবলৈ প্ৰথমে মানুহজন মাটিত থিয় হৈ লওক৷ থিয় হওঁতে ভৰি দুখনৰ মাজত দূৰত্ব দুই ইঞ্চিমানৰ ব্যৱধান ৰাখিব৷ এই সময়ত শ্বাস-প্ৰশ্বাস স্বাভাৱিক ৰাখক৷ এতিয়া দুই হাত মূৰৰ ওপৰলৈ তুলি আঙুলিবোৰ লগ লগাই ভাঁজ কৰি দিব৷ ইয়াৰ পাছত শ্বাস লৈ লৈ হাত দুখন মূৰৰ ওপৰলৈ প্ৰসাৰিত কৰক৷ ইয়াৰ পাছত ভৰি দুখনৰ আঙুলিকেইটাৰ পতা মাটিত ৰাখি মানুহজন ওপৰলৈ উঠাৰ চেষ্টা কৰক৷ আপুনি যিমান সম্ভৱ ওপৰলৈ নিজক দাঙি ধৰক৷ এই সময়ত মাত্ৰ ভৰিৰ আঙুলিয়ে শৰীৰৰ ভাৰ বহন কৰিব৷ এইদৰে কেইমিনিটমান ৰৈ পাছত আগৰ অৱস্থালৈ ঘূৰি আহক৷
