অফিচত দীৰ্ঘ সময় ধৰি চকীত বহি কাম কৰাৰ অভ্যাস প্ৰায়ভাগ লোকৰ ক্ষেত্ৰতে এটা স্বাভাৱিক প্ৰক্ৰিয়া হৈ পৰিছে৷ অথবা কম্পিউটাৰ বা লেপটপত গোটেই দিনটো বহি বহিয়েই কাম কৰাৰ ফলত পিঠি, কান্ধ বা কঁকালৰ বিষ-বেদনা আৰম্ভ হয়৷ কঁকালৰ বিষত এটা সময়ত কঁকাল লৰাব নোৱৰাৰ অৱস্থাৰ সৃষ্টি হয়৷ আৰু ইয়াৰ যদি সমাধানৰ ব্যৱস্থা কৰা নহয়, তেনেহ’লে লাহে লাহে এই অসুবিধাৰ ফলত এটা সময়ত জটিলতা বাঢ়ি বিছনাৰ পৰাও উঠিব নোৱৰা হৈ পৰে৷ চিকিৎসকে জানিবলৈ দিয়া মতে দীৰ্ঘদিন এইদৰে বহি বহি কাম কৰাৰ অভ্যাসে বেছিভাগ ক্ষেত্ৰতে মেৰুদণ্ড বেঁকা হৈ যোৱা দেখা যায়৷ ক্ৰমে পিঠিৰ ফালে কুঁজা হৈ পৰে৷ সেয়ে দিনৰ দিনটো একেলেথাৰিকৈ বহি বহি কাম কৰাৰ ফলত এইদৰে কঁকাল, পিঠিৰ বিষ নহ’বলৈ অথবা ইয়াৰ পৰা আশু সমাধান পাবলৈ শৰীৰচৰ্চাৰ আন বিকল্প নাই৷ পিঠিৰ বিষ, কঁকালৰ বিষ তথা কঁুজা হৈ নাযাবলৈ নিয়মিতভাৱে অৰ্ধচন্দ্ৰাসন আসন কৰিব পাৰে৷ নিয়মিতভাৱে অৰ্ধচন্দ্ৰাসন কৰিলে এইধৰণৰ সমস্যাৰ পৰা আপোনাক সকাহ দিব পাৰে৷
কিদৰে কৰিব অৰ্ধচন্দ্ৰাসন ঃ- এই আসন কৰিবলৈ হ’লে প্ৰথমে মানুহজন মাটিৰ ওপৰত বা মেটৰ থিয় হৈ লওক. এতিয়া যিকোনো এফালে ক্ৰমে হাউলি যিকোনো ফালৰ হাত এখনেৰে মাটিত স্পৰ্শ কৰক আৰু একেফালৰ ভৰিখন মাটিত সমান্তৰালভাৱে ৰাখক৷ আনহাতে বিপৰীত ফালে থকা ভৰিখন মাটিৰ ওপৰত শৰীৰ আৰু মূৰৰ সমান্তৰাল দিশত মেলি দিব৷ ইয়াৰ লগে লগে সেই ফালৰ হাতখনো ওপৰলৈ দাঙি ধৰিব৷ এই ভংগীত থকাৰ সময়ত দেখাত এটা অৰ্ধচন্দ্ৰৰ লেখীয়া হ’ব লাগে৷ এইদৰে কিছু সময়ত থাকি পাছত আগৰ অৱস্থালৈ ঘূৰি আহক৷ এই সময়খিনিত শ্বাস-প্ৰশ্বাস স্বাভাৱিক ধৰণে ল’ব৷