পানীয়ে এশ ৰোগৰ সমাধান কৰিব পাৰে৷ শৰীৰ সুস্থ সবল ৰাখিবলৈ পৰিমিত পৰিমাণৰ পানী সেৱন কৰাৰ পৰামৰ্শ দিয়ে চিকিৎসকে৷ শৰীৰৰ প্ৰতিটো অংগৰ সঠিক কাম-কাজৰ বাবে অপৰিহাৰ্য৷ পানী সঠিক পৰিমাণে সেৱন কৰিলে শৰীৰৰ ৰেচন প্ৰক্ৰিয়াও স্বাভাৱিক থাকে৷ শৰীৰৰ জমা হোৱা অপ্ৰয়োজনীয় বৰ্জ্য পদাৰ্থবোৰ শৰীৰৰ পৰা বাহিৰ কৰাত ৰেচন প্ৰক্ৰিয়া অৰ্থাৎ মল-মূত্ৰ সঠিকভাৱে হোৱা প্ৰয়োজন৷ কিন্তু পানী সেৱনৰ ক্ষেত্ৰত কিছু নিয়ম মানি চলাটো ভাল৷ দেহৰ শক্তিৰ অন্যতম চালিকাশক্তি পানী খোৱাৰ আগতে কিছুমান কথালৈ মন দিয়া জৰুৰী৷ আনহাতে বহু লোকে প্ৰস্ৰাৱ কৰাৰ লগে লগে পিপাসা ৰোধ কৰিবলৈ পানী সেৱন কৰে৷ প্ৰস্ৰাৱ কৰাৰ ঠিক পাছতেই তৃষ্ণাৰ অনুভৱ হয় আৰু মূত্ৰত্যাগৰ পাছতেই পানী সেৱন কৰে৷ বহুতেই আকৌ ভাবে যে প্ৰস্ৰাৱৰ জৰিয়তে যিখিনি পানী শৰীৰৰ পৰা ওলাই গ’ল, তাৰ অভাৱ পূৰণৰ বাবে পানী খোৱা অতি জৰুৰী৷ আন কাৰোবাৰ মতে প্ৰস্ৰাৱ কৰাৰ পাছতে পানী খোৱাটো মুঠেই উচিত নহয়৷ ইয়াৰ ফলত কিডনী নষ্ট হ’ব পাৰে৷ আনকি কিডনী ষ্টোন বা কিডনীৰ পাথৰ হোৱাৰ সম্ভাৱনা থাকে আদি৷ কিন্তু আচল সত্যটো কি? এই বিষয়ে বিশেষজ্ঞই কোৱা মতে আচলতে পানী খোৱাৰ সকলোতকৈ ডাঙৰ নিয়ম হ’ল শৰীৰৰ কথা, সংকেত শুনা৷ অৰ্থাৎ পানী সেৱন কৰা৷ প্ৰস্ৰাৱ কৰিলেই যদি তৃষ্ণা অনুভৱ হয়, তেনেহ’লে নিশ্চিতভাৱে পানী খোৱা উচিত৷ আনহাতে প্ৰস্ৰাৱ কৰাৰ সময়ত পানী সেৱন কৰিলে কিডনীৰ ৰোগ হ’ব পাৰে, সেই ধাৰণা একেবাৰে ভুল৷ কিন্তু মূত্ৰ ত্যাগৰ সময়ত তৃষ্ণা অনুভূত নহ’লে অকাৰণত পানী খোৱাৰ প্ৰয়োজন নাই৷ পিয়াহ নালাগিলে বিনা কাৰণত পানী সেৱন কৰা উচিত নহয়৷ বেছি পৰিমাণে পানী সেৱন কৰিলে হাৰ্ট বা কিডনীয়ে বেছি কাম কৰিবলগীয়া হয় বা কিডনীৰ ওপৰত অতিৰিক্ত চাপ পৰে৷
