বৰ্তমান কিডনীজনিত সমস্যাই সমগ্ৰ বিশ্বতে ভয়াৱহ ৰূপ ধাৰণ কৰি আহিছে৷ ইয়াৰ অন্তৰালত বিভিন্ন কাৰণসমূহৰ ভিতৰত আমাৰ জীৱনশৈলীৰ পৰিৱৰ্তনে মুখ্য বুলি ধৰা হয়৷ কিডনীজনিত ৰোগৰ চিকিৎসা, ইয়াৰ সমাধান তথা পৰামৰ্শৰ উদ্দেশ্যে বিশিষ্ট ইউৰ’লজিষ্ট ডাঃ অৰূপ কুমাৰ নাথৰ সবল নেতৃত্বত সমগ্ৰ ৰাজ্যতে বিনামূলীয়া চিকিৎসা শিবিৰ অনুষ্ঠিত কৰি আহিছে৷ ইয়াৰ অংশস্বৰূপে গুৱাহাটীৰ সোণপুৰত থকা অসম তথা উত্তৰ-পূৰ্বাঞ্চলৰ একমাত্ৰ কিডনী হস্পিটেল ইন্ষ্টিটিউট অব্ কিডনী ডিজিজেজ চমুকৈ আই ইউ কে ডিৰ ৯২ সংখ্যক বিনামূলীয়া চিকিৎসা শিবিৰটো যোৱা ২৬ মাৰ্চ তাৰিখ বুধবাৰে নলবাৰীত অনুষ্ঠিত হৈ যায়৷ আই ইউ কে ডিৰ সহযোগত আৰু হেল্পিংহেণ্ড সংস্থা আৰু ৱাৰিয়ৰ্ছ¸নলবাৰী জিলা সমিতিৰ উদ্যোগত নলবাৰীৰ হৰিমন্দিৰ প্ৰাংগণত এই চিকিৎসা শিবিৰৰ আয়োজন কৰা হয়৷ শিবিৰৰ আৰম্ভণিতে আই ইউ কে ডিৰ মুখ্য পৰিচালন সঞ্চালক তথা ৰাজ্যৰ বিশিষ্ট ইউৰ’লজিষ্ট, লেজাৰমেন খ্যাত ডাঃ অৰূপ কুমাৰ নাথক হেল্পিংহেণ্ড সংস্থা আৰু ৱাৰিয়ৰ্ছ¸নলবাৰী জিলা সমিতিৰ তৰফৰ পৰা এখন ফুলাম গামোচাৰে সম্বৰ্ধনা জনোৱা হয়৷ ইয়াৰ পাছত ডাঃ নাথে ৰোগীসকলৰ সৈতে মত বিনিময় কৰে আৰু তেওঁলোকৰ সমস্যাসমূহৰ বিষয়ে পুংখানুপুংখভাৱে জানিবলৈ বিচাৰে৷ উল্লেখ্য যে ইতিমধ্যে ডাঃ নাথে বিগত কেইমাহমান ধৰি অসমৰ বিভিন্ন প্ৰান্তত আই ইউ কে ডিয়ে কিডনী সম্পৰ্কীয় বিনামূলীয়া চিকিৎসা শিবিৰ অনুষ্ঠিত কৰি অহাৰ লগতে ৰাইজৰ পৰা বিপুল সঁহাৰি লাভ কৰিছে৷ উক্ত বিনামূলীয়া চিকিৎসা শিবিৰত কিডনী তথা প্ৰস্ৰাৱজনিত সমস্যাত ভোগা ৰোগীসকলক চিকিৎসা প্ৰদান কৰা হয় আৰু তেওঁলোকৰ এই ৰোগৰ চিকিৎসাৰ ক্ষেত্ৰত বিধানৰ লগতে বিনামূলীয়াকৈ ঔষধো প্ৰদান কৰা হয়৷ উক্ত চিকিৎসা শিবিৰত অঞ্চলটোৰ পৰা অৰ্ধশতাধিক ৰোগীৰ স্বাস্থ্য পৰীক্ষা কৰা হয়৷ শিবিৰত ডাঃ অৰূপ কুমাৰ নাথৰ নেতৃত্বত যোৱা চিকিৎসক, স্বাস্থ্যকৰ্মী, নাৰ্ছকে ধৰি এটা সঁজাতী দলে এই ৰোগীসকলক চিকিৎসা সেৱা আগবঢ়ায়৷ উল্লেখ্য যে সোণাপুৰত থকা আই ইউ কে ডি হৈছে উত্তৰ-পূৰ্বাঞ্চলৰ একমাত্ৰ তথা অন্যতম কিডনী হস্পিটেল, য’ত কেৱল কিডনী সম্পৰ্কীয় সকলো চিকিৎসা প্ৰদান কৰা হয়৷ ইতিমধ্যে এই হস্পিটেলখনত ডাঃ নাথৰ নেতৃত্বত চিকিৎসকৰ দলে সহস্ৰাধিক সফল অস্ত্ৰোপচাৰো সম্পাদন হৈছে৷
