তিতা কেৰেলাৰ সোৱাদ তিতা হ’লেও এই পাচলি স্বাস্থ্যৰ কাৰণে খুবেই উপকাৰী৷ কেৰেলাৰ বিভিন্ন ঔষধি গুণ আছে, যি ঔষধৰ লেখীয়া কাম কৰে৷ যিসকলে ডায়েবেটিছত আক্ৰান্ত হৈছে, তেওঁলোকৰ বাবে তিতা কেৰেলা মহৌষধ স্বৰূপ৷ তিতা কেৰেলাই প্ৰাকৃতিকভাৱে তেজত শৰ্কৰাৰ মাত্ৰা কমোৱাত সহায় কৰে৷ তিতা কেৰেলা খোৱাৰ অভ্যাস কৰিলে ৰক্তচাপ, কলেষ্টৰেল, কিডনী, লিভাৰ আদিৰ বিভিন্ন ৰোগ নিয়ন্ত্ৰণত সহায় কৰে৷ এই পাচলিয়ে পেটৰ কোণত জমা হোৱা ময়লা পৰিষ্কাৰ কৰাত সহায় কৰে৷ মধুমেহ ৰোগীৰ ক্ষেত্ৰত তিতা কেৰেলা ঔষধতকৈ কম নহয়৷ কেৰেলাই ইনছুলিনৰ মাত্ৰা নিয়ন্ত্ৰণ কৰে৷ কেৰেলাৰ এণ্টিবেক্টেৰিয়েল, এণ্টিভাইৰেল তথা কেঞ্চাৰ প্ৰতিৰোধী বৈশিষ্ট্য আছে, যিয়ে শৰীৰৰ ৰোগ প্ৰতিৰোধ ক্ষমতা শক্তিশালী কৰে৷ নিয়মিতভাৱে কেৰেলা খালে হাঁপানি, শ্বাসযন্ত্ৰৰ ৰোগ, হৃদৰোগ, কিডনী, লিভাৰ, পাচনতন্ত্ৰ, চকুৰ বিকাৰ, তেজৰ শৰ্কৰা, ৰক্তচাপ তথা কলেষ্টৰেলৰ দৰে ৰোগৰ সম্ভাৱনা কমাই ৰাখে৷ কেৰেলাত আইৰন, ভিটামিন-এ, ভিটামিন-বি, ভিটামিন-চি, মেংগানিজ, পটাচিয়াম, জিংক, এণ্টিঅক্সিডেণ্ট তথা হাইপোগ্লাইচেমিকৰ দৰে বহুতো পুষ্টি উপাদান থাকে৷ কেৰেলা খালে শাৰীৰিক দুৰ্বলতা দূৰ হয়৷ কেৰেলাই শৰীৰৰ ইনছুলিনৰ মাত্ৰাৰ ভাৰসাম্য বজাই ৰাখে৷ ওজন নিয়ন্ত্ৰণত কেৰেলাই যথেষ্ট কাৰ্যকৰী৷ইয়াত কেলৰি কম আৰু ফাইবাৰ বেছি থাকে৷ যাৰ বাবে বহু সময়লৈ ভোক নালাগে৷ কেৰেলাই লিভাৰক ডিটক্সিফাই কৰাত সহায়ক হয়৷ যাৰ ফলত পাচনতন্ত্ৰ শক্তিশালী হয়৷ কেৰেলাই পেটৰ বিভিন্ন সমস্যা সমাধান কৰিব পাৰে যদিও কেৰেলাই কিছু পৰিমাণে পাশ্বৰ্ক্ৰিয়াও আছে৷ কেৰেলাৰ বহুতো গুণ থাকিলেও কিন্তু কিছুমানৰ বাবে ক্ষতিকাৰক হ’ব পাৰে৷ গৰ্ভৱতী মহিলাই কেৰেলা খোৱা উচিত নহয়৷ কেৰেলাত থকা memocherin উপাদানে শিশুৰ স্বাস্থ্যৰ কাৰণে ক্ষতিকাৰক হ’ব পাৰে৷ আনহাতে প্ৰতিদিনে কেৰেলা খালে পেটৰ সমস্যা হ’ব পাৰে৷ হঠাতে পেটৰ বিষ বা এইধৰণৰ সমস্যাই দেখা দিব পাৰে৷ বেছিকৈ কেৰেলা খোৱাৰ ফলত ডায়েৰিয়াৰ চিকাৰ হ’ব পাৰে৷ বমি বমি ভাব, ওকালি আদি হ’ব পাৰে৷