গুৱাহাটীৰ সোণাপুৰস্থিত অসম তথা উত্তৰ-পূৰ্বাঞ্চলৰ একমাত্ৰ কিডনী হস্পিটেল ইন্‌ষ্টিটিউট অব্‌ ইউৰ’লজি এণ্ড কিডনী ডিজিজেজ চমুকৈ আই ইউ কে ডিৰ ৯১ সংখ্যক বিনামূলীয়া চিকিৎসা শিবিৰটো যোৱা ২৩ মাৰ্চ তাৰিখ দেওবাৰে গুৱাহাটীৰ দিছপুৰত অনুূষ্ঠিত হৈ যায়৷ আই ইউ কে ডি আৰু ইষ্টাৰ্ন ষ্ট’ন এণ্ড কিডনী ফাউণ্ডেশ্যনৰ সহযোগত তথা দিছপুৰ প্ৰেছ ক্লাবৰ উদ্যোগত গণেশগুৰিৰ গণেশ মন্দিৰৰ সমীপৰ গণেশ উদ্যানত থকা দিছপুৰ প্ৰেছ ক্লাবৰ কাৰ্যালয়ত এই চিকিৎসা শিবিৰৰ আয়োজন কৰা হয়৷ শিবিৰৰ আৰম্ভণিতে আই ইউ কে ডিৰ মুখ্য পৰিচালন সঞ্চালক তথা ৰাজ্যৰ বিশিষ্ট ইউৰ’লজিষ্ট, লেজাৰমেন খ্যাত ডাঃ অৰূপ কুমাৰ নাথক দিছপুৰ প্ৰেছ ক্লাবৰ তৰফৰ পৰা এখন ফুলাম গামোচাৰে সম্বৰ্ধনা জনোৱা হয়৷ সম্বৰ্ধনা অনুষ্ঠানত ডাঃ নাথে আই ইউ কে ডিৰ এই ৯১ সংখ্যক বিনামূলীয়া চিকিৎসা শিবিৰত বিশেষকৈ বৃক্কজনিত ৰোগত ভোগা ৰোগীসকলক চিকিৎসা তথা পৰামৰ্শ আগবঢ়োৱা হয়৷ উক্ত চিকিৎসা শিবিৰত অঞ্চলটোৰ পৰা অৰ্ধশতাধিক ৰোগীৰ স্বাস্থ্য পৰীক্ষা কৰা হয়৷ এই শিবিৰৰ জৰিয়তে ৰোগীসকলে তেওঁলোকৰ স্বাস্থ্যৰ প্ৰতি সজাগ তথা সচেতন হোৱাৰ লগতে কিডনীজনিত ৰোগৰ পৰা কিছু উপশম পাবলৈ সক্ষম হ’ব৷ আনহাতে জটিল ৰোগীসকলৰ ক্ষেত্ৰত কি কি ব্যৱস্থা গ্ৰহণ কৰিব সেই সম্পৰ্কেও ডাঃ নাথে ৰোগীসকলক সু-পৰামৰ্শ দিয়ে৷ ডাঃ নাথে লগতে উল্লেখ কৰে যে মাহৰ প্ৰতি দেওবাৰ আৰু বুধবাৰে আই ইউ কে ডিয়ে জনসাধাৰণৰ কল্যাণৰ বাবে ৰাজ্যৰ বিভিন্ন ভিতৰুৱা তথা প্ৰত্যন্ত অঞ্চলত বৃক্কৰ ৰোগত ভোগা ৰোগীসকলক পৰামৰ্শৰ বাবে এইধৰণৰ বিনামূলীয়া চিকিৎসা শিবিৰ অনুষ্ঠিত কৰি আহিছে আৰু কিডনীডনিত ৰোগ সম্পৰ্কে ৰাইজক সজাগ তথা সচেতন কৰিবলৈ এইধৰণৰ শিবিৰৰ আয়োজন কৰি আহিছে৷ অত্যধিক ধঁপাতজাতীয় সামগ্ৰীৰ সেৱনেই কিডনীজনিত বা আন আন মাৰাত্মক ৰোগৰ প্ৰাদুৰ্ভাৱ বৃদ্ধি প্ৰধান কাৰণ বুলি ডাঃ নাথে উল্লেখ কৰে৷ সেয়ে স্বাস্থ্যসন্মত জীৱন-যাপন পদ্ধতি অনুশীলন কৰিবলৈ জনসাধাৰণক তেখেতে আহ্বান জনায়৷ ডাঃ অৰূপ কুমাৰ নাথে অনাগত দিনত আই ইউ কে ডিয়ে অসমৰ চুকে-কোণে এইদৰে বিনামূলীয়া চিকিৎসা শিবিৰ অনুষ্ঠিত কৰি যাব বুলি উল্লেখ কৰে৷ ইয়াৰ পাছতে ডাঃ নাথে ৰোগীসকলৰ সৈতে মত বিনিময় কৰে আৰু তেওঁলোকৰ সমস্যাসমূহৰ বিষয়ে পুংখানুপুংখ জানিবলৈ বিচাৰে৷ শিবিৰত ডাঃ অৰূপ কুমাৰ নাথৰ নেতৃত্বত যোৱা চিকিৎসক, স্বাস্থ্যকৰ্মী, নাৰ্ছকে ধৰি এটা সঁজাতী দলে এই ৰোগীসকলক চিকিৎসা সেৱা আগবঢ়ায়৷ উল্লেখ্য যে ইতিমধ্যে ডাঃ নাথৰ নেতৃত্বত বিগত কেইমাহমান ধৰি অসমৰ বিভিন্ন প্ৰান্তত কিডনী সম্পৰ্কীয় বিনামূলীয়া চিকিৎসা শিবিৰ অনুষ্ঠিত কৰি অহাৰ লগতে ৰাইজৰ পৰা বিপুল সঁহাৰি লাভ কৰিছে৷ উক্ত বিনামূলীয়া চিকিৎসা শিবিৰত কিডনী তথা প্ৰস্ৰাৱজনিত সমস্যাত ভোগা ৰোগীসকলক চিকিৎসা প্ৰদান কৰা হয় আৰু তেওঁলোকৰ এই ৰোগৰ চিকিৎসাৰ ক্ষেত্ৰত বিধানৰ লগতে বিনামূলীয়াকৈ ঔষধো প্ৰদান কৰা হয়৷ উল্লেখ্য যে সোণাপুৰত থকা আই ইউ কে ডি হৈছে উত্তৰ-পূৰ্বাঞ্চলৰ একমাত্ৰ তথা অন্যতম কিডনী হস্পিটেল, য’ত কেৱল কিডনী সম্পৰ্কীয় সকলো চিকিৎসা প্ৰদান কৰা হয়৷