গৰমৰ দিনত প্ৰচণ্ড ৰ’দৰ পৰা সকাহ পাবলৈ কুঁহিয়াৰৰ ৰস সেৱন কৰা হয়৷ এগিলাচ কুঁহিয়াৰৰ ৰসে যেন প্ৰচণ্ড সূৰ্যৰ তাপৰ পৰা বচাই ৰাখে৷ কুঁহিয়াৰৰ ৰস এগিলাচ সেৱন কৰাৰ পাছতহে জীৱটো ঘূৰি অহা যেন অনুভৱ হয়৷ অতি সুস্বাদু তথা সুমিষ্ট কুঁহিয়াৰৰ ৰস ভাল নোপোৱা মানুহ নাই৷ কুঁহিয়াৰৰ ৰস খাবলৈ যিমান সুস্বাদু, ইয়াৰ উপকাৰিতাও সিমানেই আছে৷ কুঁহিয়াৰৰ ৰস একধৰণৰ নেচাৰেল ইমিউনিটি বুষ্টাৰ৷ মানুহে ইয়াৰ ৰস গৰমৰ দিনত অত্যধিক সেৱন কৰে৷ বিভিন্ন ধৰণৰ পুষ্টি আৰু এণ্টিঅক্সিডেণ্টেৰে ভৰপূৰ কুঁহিয়াৰৰ ৰস সেৱনৰ ফলত আমাৰ শৰীৰৰ ভাবিব নোৱৰা উপকাৰ হয়৷ শৰীৰক ডিহাইড্ৰেশ্যনৰ পৰা সকাহ দিয়ে কুঁহিয়াৰৰ ৰসে৷ প্ৰস্ৰাৱৰ জ্বলা-পোৰা কৰা, গৰমৰ বাবে কমকৈ প্ৰস্ৰাৱ হোৱা সমস্যা, পেটৰ বিভিন্ন সমস্যা, অৱসাদ তথা শৰীৰ ক্লান্তি নিৰাময়ৰ বাবে, শৰীৰৰ পানীৰ অভাৱ পূৰ কৰা, আদি নানা কাম সমাধান কৰে কুঁহিয়াৰৰ ৰসে৷ এতিয়া কথা হ’ল যে ডায়েবেটিছ থকা লোকে কুঁহিয়াৰৰ ৰস সেৱন কৰা উচিত বা স্বাস্থ্যসন্মত হয়নে? আমি জানো যে কুঁহিয়াৰৰ ৰসত যথেষ্ট পৰিমাণে প্ৰাকৃতিক শৰ্কৰা থাকে৷ যাৰ বাবে ইয়াৰ সোৱাদ অতি মিঠা হয়৷ সেয়ে কুঁহিয়াৰৰ ৰস সেৱন কৰাৰ ফলত শৰীৰৰ ছুগাৰৰ মাত্ৰা বাঢ়িব পাৰে, যিয়ে ছুগাৰত ভোগা লোকজনৰ বাবে বিপজ্জনক হ’বও পাৰে৷ আনহাতে কুঁহিয়াৰৰ ৰস সেৱন কৰিলে পলিফেনোল এণ্টিঅক্সিডেণ্ট নিৰ্গত হয়৷ সেয়ে কুঁহিয়াৰৰ ৰস খোৱাৰ পৰিৱৰ্তে আন সতেজ ফল, য’ত চেনিৰ পৰিমাণ কম থাকে, তেনেধৰণৰ ফল খোৱা উচিত৷
