দ্য আমেৰিকান কেমিকেল ছ’চাইটিৰ এক গৱেষণা পত্ৰত কোৱা হৈছে যে খাদ্যপণ্য আৰু নিত্য ব্যৱহাৰ্য বিভিন্ন সামগ্ৰীত প্লাষ্টিকৰ ক্ষুদ্ৰাতিক্ষুদ্ৰ কণা বা মাইক্ৰ’প্লাষ্টিকৰ অৱস্থিতি পোৱা গৈছে, যিবোৰে প্ৰতিমুহূৰ্ততে আমাৰ শৰীৰলৈ প্ৰৱেশ ঘটিছে৷ প্লাষ্টিক বা প্লাষ্টিকজাত দ্ৰব্যৰ পৰা স্তন কেঞ্চাৰৰ সম্ভাৱনা বৃদ্ধি পায়৷ প্লাষ্টিকত এনে চাৰিশবিধ ৰায়ায়নিকৰ উপস্থি্তি ধৰা পৰিছে, যিবোৰ মানৱ শৰীৰৰ কাৰণে মাৰাত্মক বিপদৰ কাৰণ হিচাপে বিবেচিত হৈছে৷ এই দাবী কৰিছে গৱেষকে৷ দ্য আমেৰিকান কেমিকেল ছ’চাইটিৰ জনাইছে যে এইধৰণৰ প্লাষ্টিকজাত দ্ৰব্যই কৰ্কট ৰোগৰ আশংকা বহুগুণে বৃদ্ধি কৰে৷ প্লাষ্টিকৰ দ্ৰব্য প্ৰস্তুত কৰাত বিপিএ বা বিছফেনল-এ ৰাসায়নিকবিধ ব্যৱহাৰ কৰা হয়৷ এই ৰাসায়নিকবিধ খুব সহজে নষ্ট নহয় অথবা মাটিৰ সৈতে মিহলি নহয়৷ সেয়ে ই সেইধৰণে ৰৈ যায়৷ ক্ষুদ্ৰ আকাৰত খাদ্য সৈতে মিহলি হৈ মানৱ শৰীৰত প্ৰৱেশ কৰে আৰু বিভিন্ন মাৰাত্মক ৰোগৰ সম্ভাৱনা বঢ়াই দিয়ে৷ গৱেষকৰ মতে প্ৰায় ১৬ হাজাৰ ৰাসায়নিক থাকে প্লাষ্টিকত৷ এইবোৰৰ ভিতৰত পিএফএএছ, পেৰাবেনছ, এৰোমাটিক এমাইনৰ দৰে অন্তত চাৰিশ প্ৰকাৰৰ শৰীৰৰ কাৰণে ক্ষতিকাৰক দ্ৰব্য মিহলি হৈ থাকে৷ এইবোৰ ৰায়াসনিক দৈনন্দিন ব্যৱহাৰ্য খাদ্যদ্ৰব্যত মিহলি হৈ শৰীৰত প্ৰৱেশ কৰাৰ ফলত শৰীৰৰ মাৰাক্ম ক্ষতি হয়৷ গৱেষকে জনোৱা অনুসৰি বজাৰৰ পৰা যিসমূহ চেনি বা নিমখ কিনা হয়, তাত অসংখ্য মাইক্ৰ’প্লাষ্টিক মিহলি হৈ থাকে৷ ইয়াৰ উপৰি অফিচ, কাছাৰী, মেলে-মিটিঙে ব্যৱহাৰ কৰা প্লাষ্টিকৰ বটলৰ পানীত মাইক্ৰ’প্লাষ্টিকৰ কণা মিহলি হৈ থাকে৷ সাম্প্ৰতিক গৱেষণাত কোৱা হৈছে যে এই মাইক্ৰ’প্লাষ্টিকৰ উপৰিও সূক্ষ্ম নেনোপ্লাষ্টিকৰ উপস্থিতিও ধৰা পৰিছে এইধৰণৰ নিত্য ব্যৱহাৰ্য খাদ্য দ্ৰব্যত৷ প্লাষ্টিকৰ বটলত থকা ক্ষুদ্ৰ প্লাষ্টিকৰ কণাবোৰ শৰীৰত প্ৰৱেশ কৰি তেজৰ সৈতে মিহলি হৈ যায়৷ যি প্ৰক্ৰিয়াই শৰীৰৰ কাৰণে বিপজ্জনক হৈ পৰে আৰু স্তন কেঞ্চাৰকে ধৰি বিভিন্ন জটিল সমস্যাৰ সন্মুখীন হ’বলগীয়া হয়৷
