শৰীৰত কোনবিধ ভিটামিন বাঢ়ি গ’লে কিডনীৰ সমস্যা হয়৷ এইবিধ ভিটামিন শৰীৰলৈ অধিক মাত্ৰাত গ’লে কিডনী ফেইলৰ পৰ্যন্ত হ’ব পাৰে৷ ইয়াৰ বিষয়ে জনাটো সেয়ে আৱশ্যক৷ আমি জানো যে শৰীৰ সুস্থ তথা সবল কৰি ৰাখিবলৈ ভিটামিন অপৰিহাৰ্য৷ কিন্তু বহুতেই চিকিৎসকৰ পৰামৰ্শ গ্ৰহণ নকৰি নিজৰ ইচ্ছা অনুযায়ী ভিটামিন টেবলেট খাবলৈ লয়৷ ইয়াৰ ভিতৰত হাড়ৰ বিষ অনুভৱ হ’লে নিজ ইচ্ছামতে ফাৰ্মাচীৰ পৰা ভিটামিন-ডিৰ টেবলেট কিনি খাবলৈ লয়, অথবা চৰ্বি-কাহ হ’লেও ফাৰ্মাচীৰ পৰা ভিটামিন ঔষধ আনি মুঠিয়ে মুঠিয়েই খাবলৈ লয়৷ ঠিক একেদৰে শৰীৰৰ এনাৰ্জি কমি গ’লে মাল্টিভিটামিন টেবলেটতো গ্ৰহণ কৰেই৷ কিন্তু মনত ৰখা ভাল যে শৰীৰৰ কাৰণে ভিটামিন যিমান দৰকাৰী, তেনেদৰে অধিক মাত্ৰাত ভিটামিন খোৱাৰ ফলত শৰীৰত ভিটামিনৰ মাত্ৰা বাঢ়ি গৈ কিডনীজনিত ৰোগত আক্ৰান্ত হ’ব পাৰে৷ একাধিক গৱেষণাত দেখা গৈছে যে শৰীৰত ভিটামিন-ডিৰ মাত্ৰা বাঢ়ি গ’লে কিডনীৰ বিভিন্ন অসুবিধা বা অসুখে দেখা দিব পাৰে৷ বহুতেই আকৌ ভিটামিন-ডিৰ ছাপ্লিমেণ্ট খাই থাকে৷ কিন্তু নিজৰ খেয়াল খুচিমতে এইদৰে এই ধৰণৰ ছাপ্লিমেণ্ট খোৱাৰ ফলত ওলোটাকৈ শৰীৰহে ক্ষতি কৰিব পাৰে৷ বিশেষজ্ঞই জনোৱা মতে শৰীৰত ভিটামিন-ডিৰ মাত্ৰা প্ৰয়োজনকৈ বেছি হ’লে বিভিন্ন শাৰীৰিক সমস্যাৰ সৃষ্টি হ’ব পাৰে৷ অতিৰিক্তভাৱে ভিটামিন-ডি খোৱাৰ ফলত ৰক্তনলীত কেলচিয়াম জমা হোৱাৰ সমস্যাই দেখা দিব পাৰে৷ এই পৰিস্থিতিক চিকিৎসা বিজ্ঞানৰ পৰিভাষাত কেলচিফিকেশ্যন বোলা হয়৷ ইয়াৰ ফলত কিডনীৰ সমস্যা, হাৰ্টৰ অসুখ আৰু আনকি ষ্ট˜’কৰ সম্ভাৱনাও বাঢ়িব পাৰে৷ হাড় শক্তিশালী তথা পেশীৰ স্বাস্থ্যৰ বাবে ভিটামিন-ডি অপৰিহাৰ্য৷ গৱেষণাত পোৱা গৈছে যে ভাৰতৰ মুঠ জনসংখ্যাৰ প্ৰায় ৭৬ শতাংশই ভিটামিন-ডি অভাৱত ভোগে৷ বিভিন্ন ৰোগ প্ৰতিৰোধৰ ক্ষেত্ৰত ভিটামিন-ডি অত্যন্ত গুৰুত্বপূৰ্ণ৷ কিন্তু মাত্ৰাধিক পৰিমাণে খোৱাটো বিপজ্জনক৷ সেয়ে সঠিক মাত্ৰাত ভিটামিন-ডি থকাটো স্বাস্থ্যসন্মত৷