বৰ্তমান সময়ত কিডনী তথা লিভাৰ সম্বন্ধীয় ৰোগৰ প্ৰাদুৰ্ভাৱ বৃদ্ধি পোৱা পৰিলক্ষিত হৈছে৷ ইয়াৰ বিভিন্ন কাৰণ আছে যদিও সৰহভাগ কাৰকৰ বাবে আমিয়েই দায়ী৷ অনিয়মীয়া তথা অসন্তুলন খাদ্য গ্ৰহণ, মাদকদ্ৰব্যৰ ব্যাপক প্ৰচলন, ভেজাল খাদ্য সামগ্ৰী, জাংকফুডৰ প্ৰতি আকৰ্ষণ, শৰীৰচৰ্চাৰ অভাৱ, আৰামপ্ৰিয় জীৱনশৈলী আদি বিভিন্ন কাৰণৰ বাবে লিভাৰ তথা কিডনীজনিত সমস্যাই দেখা দিব পাৰে৷ গতিকে এই সমস্যাৰ পৰা সমাধান তথা নিজক দূৰত ৰাখিবলৈ আমি আগতীয়াভাৱে কিছুমান ব্যৱস্থা গ্ৰহণ কৰিলে এইধৰণৰ ৰোগৰ পৰা হাত সাৰি থাকিব পাৰি৷ প্ৰথম কথাটো হ’ল লিভাৰ আৰু কিডনী ভালে ৰাখিবলৈ দৈনিক সঠিক পৰিমাণ পানী সেৱন কৰাটো অত্যন্ত জৰুৰী৷ সঠিক মাত্ৰাত পানী সেৱন কৰাৰ ফলত শৰীৰত জমা হোৱা টক্সিন বাহিৰ কৰাত সহায়ক হয়৷ যাৰ ফলত কিডনী বা লিভাৰৰ ওপৰত চাপ কমকৈ পৰে৷ দ্বিতীয়তে কিডনী আৰু লিভাৰৰ সুস্থতা তথা ভালে ৰাখিবলৈ পৰ্যাপ্ত পৰিমাণৰ টোপনি মৰা অতি প্ৰয়োজনীয়৷ দৈনিক ৭-৮ ঘণ্টা টোপনি মৰাটো শৰীৰৰ বাবে যথেষ্ট উপকাৰী৷ টোপনিৰ সময়ত আমাৰ শৰীৰ ডিটক্সিফিকেশ্যন হয়৷ বিশেষকৈ সেই সময়খিনিত লিভাৰে ভালদৰে কাম কৰাত সহায়ক হয়৷ তৃতীয়তে, লিভাৰ আৰু কিডনীৰ ভালে ৰাখিবলৈ হ’লে কেঁচা নিমখ খোৱাৰ অভ্যাস একেবাৰে ত্যাগ কৰক৷ নিমখে শৰীৰত ছ’ডিয়ামৰ মাত্ৰা বঢ়াই দিয়ে৷ যাৰ বাবে শৰীৰত ফ্লুইড জমা হয় আৰু কিডনীৰ ওপৰত অতিৰিক্ত চাপ পৰে বাবে কিডনীৰ কাৰ্যকাৰিতা হ্ৰাস পায়৷ আনহাতে এণ্টিঅক্সিডেণ্টযুক্ত খাদ্য খালে কিডনী আৰু লিভাৰ ভালে ৰখাত সহায় কৰে৷ গ্ৰীন টী দিনত এবাৰ সেৱন কৰিলে লিভাৰ আৰু কিডনীৰ স্বাস্থ্যৰ কাৰণে উপকাৰী৷ অৱশ্যে ইয়াতকৈ বেছি পৰিমাণে খালে অপকাৰ হ’ব পাৰে৷ গো্টেই দিনটো ফিট এণ্ড ফাইন হৈ থাকিবলৈ দৈনিক শৰীৰচৰ্চা কৰাটো অত্যন্ত আৱশ্যক৷ নিয়মিত শৰীৰচৰ্চাই আমাৰ মন-মগজু শান্ত কৰাৰ লগতে শৰীৰটোও ফিট ৰাখে৷ বিশেষকৈ কিডনী, লিভাৰ আদি অভ্যন্তৰীণ অংগৰ স্বাস্থ্য সুৰক্ষিত কৰি ৰাখে শৰীৰচৰ্চাই৷
