বিশ্ব স্বাস্থ্য সংস্থা চমুকৈ হুৰ সঞ্চালক প্ৰধান টেড্ৰোছ আধানোম গেব্ৰিয়েছাছে কয় যে সমগ্ৰ বিশ্বত কলেৰাৰ ভেকচিনৰ উদ্বেগজনকভাৱে নাটনি হৈছে আৰু এই ভেকচিনৰ উৎপাদন ততালিকে বৃদ্ধি কৰিবলৈ দেশসমূহলৈ তেওঁ আহবান জনাইছে৷ ৰাষ্ট্ৰসংঘৰ স্বাস্থ্য সংস্থাটোৱে লগতে এইবুলিও কয় যে ২৮ জুলাইলৈ ৪ খন দেশত তিনি লাখ সাত হাজাৰ ৪৩৩ জন লোকৰ কলেৰাত সংক্ৰমণ হৈছিল আৰু ২৩২৬ জন লোকৰ মৃত্যু হৈছিল৷ সংস্থাটোৰ মুৰব্বীজনে লগতে উল্লেখ কৰে যে চাহিদাতকৈ কলেৰাৰ ভেকচিনৰ যোগান যথেষ্ট পৰিমাণে হ্ৰাস পাইছে৷ ১৮ খন দেশক ১০ কোটি ৫০ লাখ ড’জ ভেকচিনৰ প্ৰয়োজন হৈছে৷ আনহাতে ভেকচিন বিচাৰি এই দেশসমূহে যোৱা জানুৱাৰীৰ পৰাই অনুৰোধ জনাই আহিছে যদিও ভেকচিনৰ নাটনিৰ বাবে পৰ্যাপ্ত মাত্ৰাত যোগান ধৰাত ব্যৰ্থ হৈছে৷ এই বছৰ জানুৱাৰীৰ পৰা মে’ৰ ভিতৰত অৰেল কলেৰা ভেকচিনৰ মজুত একেবাৰে শেষ হৈ যায়৷ স্বাস্থ্য সংস্থাটোৰ মুৰববীজনে কয় যে পূব ভূমধ্য সাগৰীয় অঞ্চল, আফ্ৰিকা আৰু দক্ষিণ পূব এছিয়াত কলেৰাৰ প্ৰাদুৰ্ভাৱ আটাইতকৈ বেছি৷
