বৰ্তমান শিশুসকলৰ মাজত ওজন বাঢ়ি যোৱাৰ প্ৰৱণতা অধিক হাৰত বৃদ্ধি পাইছে৷ অস্বাস্থ্যকৰ খাদ্যাভ্যাস তথা শৰীৰচৰ্চাৰ অভাৱৰ বাবে শিশুৰ মাজত স্থূলতাৰ সমস্যা এতিয়া ঘৰে ঘৰে দেখা যায়৷ অৱশ্যে ইয়াৰ ব্যতিক্ৰমো নোহোৱা নহয়৷ শিশুৰ সাৰ্বিক বৃদ্ধি আৰু বিকাশ যি বয়সত হয়, সেই নিৰ্দিষ্ট সময়খিনিত যদি শৰীৰৰ ওজন কম বা চেহেৰা শীৰ্ণকায় হয়, তেতিয়াহ’লে চিন্তাৰ বিষয় হৈ পৰে৷ শিশুৰ বয়স তথা ওজন অনুযায়ী বডী মাছ ইনডেক্স বা বিএমআই যদি ৫১ তলত থাকে, তেনেহ’লে শিশুৰ চেহেৰাৰ লৈ অভিভাৱকসকলৰ চিন্তাৰ কাৰণ হ’ব পাৰে৷ বিভিন্ন সময়ত দেখা যায় যে প্ৰি মেচিয়’ৰ শিশুৰ ক্ষেত্ৰত পৰৱৰ্তী সময়ত তেনেদৰে ওজন বৃদ্ধি নহয় অৰ্থাৎ ওজন বৃদ্ধিৰ সমস্যা থাকে৷ মাতৃৰ গৰ্ভাৱস্থাত থকাৰ সময়ত যদি ভ্ৰূণ সঠিকভাৱে নাবাঢ়ে
অথবা মাতৃগৰাকীৰ কোনো শাৰীৰিক সমস্যা থাকে, তেনে ক্ষেত্ৰত জন্মৰ সময়ত শিশুটিৰ ওজন কমি থাকে৷ অৱশ্যে মাতৃগৰাকীৰ কোনো শাৰীৰিক সমস্যা নাথাকিলেও শিশুটিৰ ওজন কমি যাব পাৰে৷ পৰ্যাপ্ত পৰিমাণে কেলৰি শৰীৰে নাপালে বা শৰীৰৰ পুষ্টিকৰ উপাদান সঠিক মাত্ৰাত শৰীৰলৈ নগ’লে এনে হ’ব পাৰে৷ বয়স অনযায়ী, উচ্চতা অনুপাতে শিশুৰ ওজন কিমান হ’ব লাগে, তাৰ এক মাপকাঠী আছে৷ ইয়াৰ হেৰফেৰ হ’লেই ব্যৱস্থা গ্ৰহণ কৰা আৱশ্যক৷ সেই অনুসৰি ছমাহৰ শিশু এটিৰ গড় ওজন ৭-৯.২ কিলোগ্ৰাম হ’ব লাগে৷ আঠ মাহৰ শিশু এটিৰ গড় ওজন ৭.৮-৯. ৮ কিলোগ্ৰাম হ’ব লাগে৷ ৯ মাহৰ শিশু এটিৰ গড় ওজন ৮-১০.৫ কিলোগ্ৰাম হ’ব লাগে৷ এবছৰীয়া ল’ৰাৰ ক্ষেত্ৰত গড় ওজন দহ কিলোগ্ৰাম বা তাৰ ওপৰত, আনহাতে দহ বছৰীয়া ছোৱালীৰ ক্ষেত্ৰত শৰীৰৰ ওজন ৯ কিলোগ্ৰামৰ ওচৰা-উচৰি থাকিব লাগে৷ তিনিৰ পৰা পাঁচ বছৰীয়া ল’ৰাৰ ক্ষেত্ৰত ১৪-১৭ কিলোগ্ৰামৰ বিপৰীতে ছোৱালীৰ ক্ষেত্ৰত ১৪-১৬ কিলোগ্ৰামৰ ওপৰত থাকিব লাগে৷ ইয়াৰ অন্যথা শিশুৰ শাৰীৰিক ওজন হ’লে অভিভাৱকৰ কৰণীয়খিনি তলত উল্লেখ কৰা হ’ল৷
মনত ৰাখিব শিশুটিৰ ওজন কম মানেই একেলগে সৰহকৈ খাদ্য খাবলৈ দিব, এনে নহয়৷ বৰং নিয়ম অনুযায়ী অলপ অলপকৈ সময়মতে শিশুটিক খাবলৈ দিব৷ সুষম আহাৰ বুলিলে ভাত, ৰুটী, ডালিয়া, ওটচ আদি শিশুটিক খাবলৈ দিব৷ সকলো ধৰণৰ চবজি খাদ্য তালিকাত ৰাখক৷ নিৰ্দিষ্ট মাত্ৰাত গাখীৰ খাবলৈ দিয়ক৷ নিয়মিতভাৱে ফল খাবলৈ দিবই৷ ইয়াৰ ভিতৰত আপেল, কল, বিভিন্ন প্ৰকাৰৰ বেৰী, আঙুৰ, ,জাম, ,নাচপতি, মধুৰিআম, পকা অমিতা অত্যন্ত উপকাৰী৷ দৈনিক ৫০-১০০ গ্ৰামকৈ ফল-মূল খাবলৈ দিব৷ বয়স অনুয়াযী শিশুটিৰ ওজন কম থাকিলে আলু আৰু মিঠাই খুৱাব পাৰে৷ তেল অবিহনে আলু সিদ্ধ বা ভাতত দি, বা আলুৰ তৰকাৰী কৰিও খুৱাব পাৰে৷ যদি শিশুটিয়ে খিচিৰি খাবলৈ পচন্দ কৰে, তেনেহ’লে বেছি ভাল৷ চাউল, দাইল, আলু, চবজি একেলগে খালে শিশুটিৰ পুষ্টি পায়৷ পাঁচ বছৰৰ আগতেই যিকোনো বস্তু সিদ্ধ কৰি খুওৱা ভাল৷ পৰৱৰ্তী সময়ত মাছ, চিকেন আদি দিব পাৰে৷ শিশুটিয়ে দৈনিক একে খাদ্য পচন্দ নকৰিলে সলনা সলনিকৈ পচন্দৰ খাদ্য যোগান ধৰক৷ বাহিৰ পেকেটজাত খাদ্য সামগ্ৰী একেবাৰে নিদিব৷ ইয়াৰ পৰিৱৰ্তে বিভিন্ন ড্ৰাই ফ্ৰুইটছ খাব দিব পাৰে৷