ৰাতি শুই থকাৰ সময়ত আপোনাৰ ঘনাই পেচাব লাগে নেকি? আমাৰ সকলোৰে এটা অভিজ্ঞতা আছে যে আপুনি সুন্দৰকৈ টোপনি গৈ আছে, কিন্তু তাৰ মাজতে আপুনি উঠিবলৈ বাধ্য কাৰণ আপোনাৰ প্ৰস্ৰাৱ লাগিছে৷ যদিও আমি প্ৰস্ৰাৱ ৰখাই থোৱাটো উচিত নহয়, তথাপিও সঘনাই প্ৰস্ৰাৱ লগাটো এটা অশান্তিকৰ সমস্যা৷ সাধাৰণতে আমাৰ শৰীৰে দিনটোত ১-২ লিটাৰ প্ৰস্ৰাৱ উৎপন্ন কৰে আৰু ইয়াৰে ২৫% প্ৰস্ৰাৱ ৰাতিহে উৎপন্ন হয়৷ গতিকে টোপনিৰ মাজত ৰাতি প্ৰস্ৰাৱ কৰিবলৈ উঠাৰ কোনো প্ৰয়োজন নাথাকে৷ কিন্তু যদি আপুনি ৰাতি সঘনাই বাথৰূমলৈ যাবলগীয়া হৈছে, তেন্তে আপোনাৰ মূত্ৰাশয়ৰ সমস্যা হৈছে, যিটো আপোনাৰ নিয়ন্ত্ৰণত নাথাকে৷ ইয়াক Nocturia বুলিও কোৱা হয়৷ ইয়াৰ অৰ্থ হ’ল যে আপোনাৰ ৰাতি প্ৰস্ৰাৱ অধিক উৎপন্ন হয়৷ এই সমস্যাটো পুৰুষতকৈ মহিলাৰ ক্ষেত্ৰত বেছি দেখা যায়৷এই সমস্যাৰ প্ৰধান কাৰণসমূহ হ’ল–
(১) শুবলৈ যোৱাৰ আগতে অধিক পৰিমাণে পানী খোৱা, (২) মূত্ৰাশয়ৰ সমস্যা, (৩) পুৰুষৰ ক্ষেত্ৰত প্ৰষ্টেট গ্ৰন্থিৰ সমস্যা, (৪) বৃক্ক দুৰ্বল হোৱা, (৫) ঔষধৰ পাশ্বৰ্ক্ৰিয়া ইত্যাদি৷
এই সমস্যা হ’লে আমি তৎক্ষণাৎ চিকিৎসকৰ ওচৰ চাপিব লাগে যদিও কিছুমান ঘৰুৱা নিয়ম মানি আমি এনে সমস্যা কিছু পৰিমাণে নিয়ন্ত্ৰণত আনিব পাৰোঁ-
(১) ৰাতি আঠ বজাৰ পাছত কোনোধৰণৰ পানীয় সেৱন নকৰিব৷
(২) কেফেইন আৰু এলকহল জাতীয় দ্ৰব্য সেৱন নকৰিব৷ দুয়োবিধ দ্ৰব্যই পেচাবক অধিক এচিডিক কৰি তোলে৷ যাৰ ফলত সঘনাই প্ৰস্ৰাৱ লাগি থাকে৷
(৩) হজম নোহোৱা খাদ্যবোৰে আমাৰ প্ৰস্ৰাৱৰ পৰিমাণ বৃদ্ধি কৰে, সেয়ে ৰাতি এনেধৰণৰ খাদ্যৰ পৰা আঁতৰি থাকক৷
(৪) শুবলৈ যাওঁতে প্ৰস্ৰাৱ কৰিহে শুব৷
