পুৱা বিছনাৰ পৰা উঠিয়েই টুথব্ৰাছডাল বিচৰাটো সকলোৰে এক পৰিচিত অভ্যাস৷ নিত্য ব্যৱহাৰ কৰা অত্যাৱশ্যকীয় সামগ্ৰীসমূহৰ ভিতৰত টুথব্ৰাছডাল এক অন্যতম আহিলা৷ কিন্তু আমি বহুতেই এই টুথব্ৰাছডাল মাহৰ পাছত মাহ ব্যৱহাৰ কৰাৰ পাছতে পেলাই নিদি ব্যৱহাৰ কৰি থাকোঁ৷ তেনে কৰা উচিতনে ? উত্তৰত ক’ব লাগিব মুঠেও নহয়৷ এডাল টুথব্ৰাছ একেলেথাৰিয়ে কেইবামাহ ধৰি ব্যৱহাৰ কৰা অনুচিত৷ আমি ব্যৱহাৰ কৰা টুথব্ৰাছৰ এটা নিৰ্দিষ্ট সময়লৈ ম্যাদ আছে৷ দেখাত একে থাকিলেও এটা সময়ৰ ভিতৰত ইয়াৰ কাৰ্যকাৰিতা কমে আৰু ইয়াত নানা বীজাণুৱে বাস কৰিবলৈ লয়৷ গতিকে তেনে টুথব্ৰাছ ব্যৱহাৰ কৰাটো গ্ৰহণযোগ্য নহয়৷
আমেৰিকাৰ Centers for Disease Control and Prevention-এ পৰামৰ্শ দিছে যে প্ৰতি তিনি মাহৰ অন্তৰে অন্তৰে আমি টুথব্ৰাছ সলনি কৰা উচিত৷ টুথব্ৰাছ কেইদিনমান ব্যৱহাৰ কৰাৰ পাছত বেঁকা হ’বলৈ আৰম্ভ কৰে৷ তেনে টুথব্ৰাছ ব্যৱহাৰ কৰা উচিত নহয়৷ অন্যথা এই টুথব্ৰাছ ব্যৱহাৰ কৰাৰ ফলত ইয়াত থকা বীজাণুৰ জৰিয়তে আমাৰ অনিষ্ট সাধন হ’ব পাৰে৷ আনহাতে যিসকলে বৈদ্যুতিক টুথব্ৰাছ ব্যৱহাৰ কৰে, তেওঁলোকে প্ৰতিটো সপ্তাহৰ মূৰত টুথব্ৰাছৰ মূৰবোৰ সলনি কৰিব লাগে৷ আপুনি যদি মুখৰ কোনো সংক্ৰমণত ভুগিছে, তেতিয়াও টুথব্ৰাছ সলনি কৰাটো জৰুৰী৷ মনত ৰখা উচিত যে আপোনাৰ যদি জ্বৰ হৈছে বা অভ্যন্তৰীণ কোনো ৰোগ হয়, ৰোগৰ উপশমৰ পাছতে টুথব্ৰাছ সলনি কৰিব৷ কিয়নো আগতে ব্যৱহাৰ কৰা টুথব্ৰাছডালৰ পৰা আপুনি সংক্ৰমিত হ’ব পাৰে৷ ইয়াৰ উপৰি আপুনি কেতিয়াও আনে ব্যৱহাৰ কৰা টুথব্ৰাছ ব্যৱহাৰ নকৰিব৷ Centers for Disease Control and Prevention-এ জনোৱা মতে টুথব্ৰাছ সলনি নকৰাৰ ফলত পুৰণি টুথব্ৰাছত যিধৰণৰ জীৱাণু থাকে সেইবোৰে মুখৰ ভিতৰ বা কণ্ঠনলীৰ সংক্ৰমণ ঘটাই ৰোগ সৃষ্টি কৰিব পাৰে৷ অন্ত্ৰ, পেটৰ সমস্যা বা শৰীৰৰ অভ্যন্তৰীণ সমস্যা আদিৰো কাৰক হ’ব পাৰে মাহ মাহ ধৰি ব্যৱহাৰ কৰি থকা টুথব্ৰাছডাল৷
